Елімай мен Астана еурокубоктағы ойындарын аяқтады

Семейдің «Елімай» клубы УЕФА Конференциялар лигасының бірінші іріктеу кезеңіндегі қарымта матчта Арменияның «Алашкерт» командасына пенальти сериясында есе жіберіп, турнирдегі алғашқы ойынын ерте аяқтады.

Кездесу қонақтардың жылдам голымен басталды. Матчтың 4-минутында семейлік қорғаушылардың қателігін тиімді пайдаланған Момо Туре есеп ашты. Алайда арада жеті минут өткенде Ақмал Бахтияров алыстан дәл соққы жасап, таразы басын теңестірді.

Екінші таймда екі команда да бірнеше қауіпті шабуыл ұйымдастырғанымен, негізгі уақытта жеңімпаз анықталған жоқ.

Қосымша уақытта «Елімай» алға шықты. 96-минутта Хрвое Илич пенальтиді сәтті орындап, қазақстандық клубқа басымдық сыйлады. Алайда матчтың соңғы, 121-минутында Даудо Тогола есепті теңестіріп, ойын тағдырын пенальти сериясына ұластырды.

Матчтан кейінгі пенальтиде «Алашкерт» ойыншылары дәлдік танытып, 6:5 есебімен жеңіске жетті. Шешуші соққыны «Елімай» футболшысы Паласио орындай алмай, оның добын армян клубының қақпашысы қайтарды.

Осылайша, «Алашкерт» Конференциялар лигасының екінші іріктеу кезеңіне жолдама алып, Румынияның «Клуж» клубымен кездесетін болды. Ал «Елімай» өз тарихындағы алғашқы еурокубок маусымын аяқтады.

Конференция лигасындағы «Астана» мен «Елімай» кіммен ойнайды?

Ал елордалық «Астана» алғашқы кездесуін  Албанияда өткізіп, ол жақта 1:0 есебімен жеңіске жеткен болатын. Сондықтан қарымта ойынға «Астана» басымдықпен шықты.

Ойынның 23-минутында Бауыржан Исламхан пенальтиді сәтті орындап, алаң иелерін алға шығарды.

Алайда екінші таймда ойынның бағыты күрт өзгерді. Қақпашы Йосип Чондричтің өрескел қателігінен кейін қорғаушы Кипрас Казуколовас айып алаңында ереже бұзып, екінші сары қағазын алып, алаңнан қуылды.

50-минутта Бруно Дита пенальтиден есепті теңестірсе, араға 12 минут салып Херукан Бериша қонақтарды алға шығарды. Бір ойыншы артық болған албаниялық клуб қосымша уақытта басымдығын толық пайдаланды. 93-минутта Лоренцо Вила, ал 120+4-минутта Мұстафа Кома гол соғып, «Динамо Ситидің» жеңісін түйіндеді.

Осылайша, «Динамо Сити» Конференциялар лигасының екінші іріктеу кезеңіне жолдама алды, ал «Астана» еурокубоктағы ойынын аяқтады.