Елімізде тұтынушыларға 2,2 млрд теңге қайтарылды

2,2 млрд теңге. Биылғы он айда сапасыз тауар мен дұрыс көрсетілмеген қызмет үшін азаматтарға қайтарылған өтемақы көлемі осындай. Өткен жылы уәкілетті органға 62,5 мың өтініш түссе, биыл бұл көрсеткіш әлдеқайда жоғарылаған. 

Арыздардың басым бөлігі онлайн дүкендерге қатысты. Осыған байланысты ведомство электрондық саудаға қойылатын талаптарды күшейтіп, тұтынушылардың құқығын қорғау процесін жетілдіруге кірісті. Қазір «Тұтынушылардың құқықтарын қорғау туралы» заңға бірнеше өзгерістер енгізіліп, Мәжілісте қаралу үстінде. Заң жобасы тұтынушылардың құқықтарын сапалы қорғауды қамтамасыз етуге және үкіметтік емес институттардың рөлін арттыруға бағытталған.

Болат Таңабергенов, ҚР Сауда және интеграция министрлігі тұтынушылардың құқығын қорғау комитетінің төрағасы:

- Бұл заң жобасы Мемлекет басшысының тапсырмасы бойынша, азаматтардың келіп түскен өтініштерін талдау және мониторингілеу нәтижелерін, қоғамдық институттардың пікірлері мен ұсыныстарын және әлеуметтанулық зерттеудің негативті көрсеткіштерін ескере отырып әзірленді. 2024 жылғы 4 қыркүйекте заң жобасын Парламент Мәжілісінің депутаттары бірінші оқылымда мақұлдады. Ағымдағы жылғы 24 маусымда заң жобасы Парламент Мәжілісінің Экономикалық реформа және Өңірлік даму жөніндегі бас комитетінің отырысында мақұлданды.