Еліміздің оңтүстік өңірлерінде жер сілкінісі сезілді

Төтенше жағдайлар министрлігіне қарасты «ННЦСНИ» сейсмикалық станциялар желісінің деректеріне сәйкес, 3 қарашада түнгі сағат 01:29-да жер сілкінісі тіркелді. Эпицентр Алматы қаласынан оңтүстік-батысқа қарай шамамен 1079 шақырым қашықтықта, Ауғанстан аумағында орналасқан, деп жазады Egemen.kz.

Фото: Ашық дереккөз

Сейсмикалық дүмпудің координаттары – 36.843º солтүстік ендік пен 67.364º шығыс бойлық. Тереңдігі 120 шақырымды құраған жер сілкінісінің магнитудасы MPV 6.2, энергетикалық класы 14.2 болған.

Есептік деректерге сүйенсек, жер сілкінісінің күші еліміздің бірқатар оңтүстік аймақтарында 2 балл шамасында сезілген. Атап айтқанда, Шымкент қаласында, Түркістан облысының Мақтаарал ауданындағы Мырзакент елді мекенінде, Жетісай және Шардара қалаларында жеңіл дүмпулер байқалған.

Қазіргі уақытта зардап шеккендер мен қираулар туралы ақпарат түскен жоқ. Мамандар жағдайды бақылауда ұстап отыр.