Ең арзан сүт қай өңірде сатылып жатыр

АСТАНА, 26 ақпан – Sputnik. Қазақстанда өңделген сұйық сүт пен кілегей өндірісі былтыр 665,2 мың тоннаға жетіп, 2024 жылмен салыстырғанда 7,1%-ға артты, деп хабарлады Energyprom.kz.

Бұл – кейінгі онжылдықтағы ең жоғары өсімнің бірі: ұқсас нәтиже тек 2018 жылы (7,2%) және 2020 жылы (7,5%) тіркелген. Салада өндіріс көлемі қатарынан үшінші жыл өсті.

Оң динамика биыл да сақталып отыр: қаңтар айында 53,8 мың тонна өнім өндірілді, бұл 2025 жылдың қаңтарымен салыстырғанда 6,1%-ға артық. Бір жыл бұрынғы өсім 6,4% болған еді.

Өткен жылдың қаңтар-желтоқсан айларында отандық сүт зауыттары ішкі нарықтағы сұранысты (ішкі өткізу және экспортты қоса алғанда) 95,1%-ға қамтамасыз етті. 2024 жылдың сәйкес кезеңінде бұл көрсеткіш 94,6% болған. Импорт 4%-ға қысқарып, 34,2 мың тоннаны құрады.

Қазақстаннан сүт экспорты 88,6%-ға өсіп, 2,7 мың тоннадан 5,1 мың тоннаға дейін артты. Ішкі нарықтағы сауда көлемі 694,3 мың тоннаны құрап, бір жылда 6,2%-ға ұлғайды.

2026 жылдың қаңтарында елде ішетін сүт бір айда 0,4%-ға қымбаттады. Жылдық мәнде баға 2025 жылдың қаңтарымен салыстырғанда 9,2%-ға өсті. Майлылық деңгейі бойынша да ұқсас жағдай байқалады:

2,2–2,5 пайыз майлылықтағы сүт – 8,9%-ға,

3,2–4,5 пайыз – 9,4%-ға,

6 пайыздан жоғары – 9,3%-ға қымбаттады.

Кейінгі жылдары нарықтағы инфляция баяулағаны байқалады. 2023 жылы сүт бағасы бір жылда 32,9%-ға шарықтаған еді. 2024 жылы өсім 14,4%, 2025 жылы 6,9% болды. Биылғы 9,2% өсім соңғы жоғары көрсеткіштермен салыстырғанда қалыпты деңгейде қалып отыр.

2026 жылдың қаңтарында бөлшек сауда бағасы өңірлер арасында айтарлықтай ерекшеленді. Қазақстан бойынша орташа баға:

2,2–2,5 пайыз майлылықтағы сүт – литріне 610 теңге,

3,2–4,5 пайыз – 660 теңге.

2,2–2,5 пайыз майлылықтағы сүт ең қымбат бағамен Қызылорда (880 теңге) және Атырау (858 теңге) қалаларында сатылды. Ал ең арзан баға Талдықорған (381 теңге), Көкшетау (417 теңге) және Павлодар (415 теңге) қалаларында тіркелді. Ең қымбат және ең арзан баға арасындағы айырмашылық 2,3 есеге жетті.

3,2%–4,5% майлылықтағы ең қымбат сүт Атырау және Ақтау қалаларының дүкендеріне шығарылды (тиісінше 871 және 816 теңге). Ал ең төмен баға Орал қаласында – 437 теңге, бұл Атыраумен салыстырғанда екі есе арзан.