Еңбек министрлігі скринингке арналған демалыстың маңызды тұсын атады

Жұмыс істейтін барлық қазақстандық скринингтен өту үшін ақылы әлеуметтік демалыс алуға құқылы. Мемлекеттік еңбек инспекциясы комитетінің төрағасы Мейрамбек Ахметов бұл құқықты қалай пайдалану керектігін және оны рәсімдеу үшін қандай құжаттар қажет екенін айтып берді, деп хабарлайды TengriHealth.

Демалысты қашан және қалай рәсімдеуге болады?

Мейрамбек Ахметовтың айтуынша, күнтізбелік жыл ішінде қызметкерге профилактикалық тексеруден өту үшін үш жұмыс күні беріледі. Осы кезеңде оның жұмыс орны мен орташа жалақысы сақталады.

"Бұл демалысты толық та, бөліп те пайдалануға болады. Яғни, скринингтен өту үшін бірден үш жұмыс күнін алуға немесе оны бөлуге болады. Мысалы, үш рет бір күннен немесе екі күн және бір күн алуға болады. Мұның бәрі медициналық тексеруден өту қажеттілігіне байланысты", - дейді ол.

Анықтама: Скрининг - бұл ауруды тиімді емдеу мақсатында оны ерте анықтау үшін жүргізілетін профилактикалық тексеру.

Тексеруге келу туралы емханадан жолданған SMS, қоңырау немесе хабарлама демалыс алуға негіз бола алады.

Егер қызметкер тексеруден өз бастамасымен өтуді ұйғарса, ол жұмыс берушіге жазбаша өтініш білдіріп, скринингтен өту үшін демалыс беруді сұрай алады.

Ахметов Халық денсаулығы және денсаулық сақтау жүйесі туралы кодекске сәйкес, азаматтар профилактикалық медициналық тексеруден өтуге міндетті екенін еске салды.

Естеріңізге сала кетейік, 2027 жылғы 1 қаңтардан бастап медициналық тексеруден өту үшін әлеуметтік демалыс беру ережесі өзгереді.

Негізгі өзгеріс процесті цифрландырумен байланысты, оның тетіктерін қазіргі уақытта Еңбек министрлігі Денсаулық сақтау министрлігімен бірлесіп пысықтап жатыр.

Жүйе автоматты түрде жұмыс істейді деп жоспарланған: Денсаулық сақтау министрлігі азаматтар тізімін компаниялардың кадрлық жүйелерімен біріктіреді. Осыдан кейін адам тіркелген емхана eGov арқылы қызметкердің өзіне де, оның жұмыс берушісіне де скринингтен өту қажеттілігі туралы хабарлама жібереді.

Тағы оқыңыз: Қазақстандағы скринингке арналған демалыс: не өзгерді?

Google News арқылы жаңалықтарымызды қадағалаңыз

скрининг

Еңбек және халықты әлеуметтік қорғау министрлігі

жұмысшы

Денсаулық

демалыс