Енді дәрігерлерге жасанды интеллект көмектеседі

Елде дәрігерлер науқастарға жасанды интеллектінің көмегімен диагноз қойып жүр. Жүйенің дәлдік деңгейі 90 пайыз.

Пилоттық жоба әзірге Ақмола облысының емханаларында сынақтан өтіп жатыр. Тың технология қағазбастылыққа кеттін уақытты үнемдейді, - дейді.

Ақмолада диагнозды дәрігер емес, жасанды интеллект қояды. Дертіне ем іздеп келген науқас, жаңа құрылғыға өзін мазалап жүрген жайттарды баяндайды. Сөйтіп ол бірден платформаға еңгізіліп, бірнеше болжамды диагноз шығарады. Артынша ақхалаттылар соған қарап, ем тағайындайды.

Гүлмира Нұрмағамбетова, дәрігер:

- Осы жоба аясында жұмысымыз оңтайландырылды. Мысалы, қазір күніне келетін 15 науқас болса, соның шамамен 8-не жасанды интеллект арқылы болжамды диагноз қоямыз.

Пилоттық жоба Ақмоладағы емханаларда сынақтан өтіп жатыр. Оның ішінде ауылдағы медициналық мекемелер де бар. Мысалы, облыс орталығының іргесіндегі Красный яр ауылының мамандары соңғы бір айда 100-ге жуық адамға жасанды интеллектінің көмегімен болжамды диагноз қойған.

Раиса Жукова, Красный Яр ауылының тұрғыны:

- Қазір емханадағы тексеріміз тез өтеді. Бұрынғыдай сағаттап кезек күтпейміз. Кабинеттен кабинетке қағаз тасып сабылмаймыз. Өте тиімді жоба деп ойлаймын.

Сандық жүйе дәрігерлердің жұмысын едәуір жеңілдетеді дейді мамандар. Әсіресе компютердің бас алмай, қағазға көміліп жататын мамандар үшін өте тиімді.

Бақтияр Мұхаметқалиев, ЦҰҚО бас директоры:

- Қазір Ақмолада 40-тан аса дәрігер тың технологияны қолданып жүр. Алдағы уақытта олардың қатары арта түспек. Себебі жауаптылар пилоттық жобаны өңірдегі 300 медициналық учаскеге еңгізуді көздеп отыр.

Авторлары: Әлішер Әли, Абзал Азаматұлы