Жасанды интеллект 2026 жылы энергетика саласына қалай көмектеседі

АСТАНА, 5 қаңтар – Sputnik. Қазақстанның Энергетика министрлігі 2026 жылғы басымдықтарды атап өтіп, былтыр сәтті іске асырылған жобаларды кеңейту жоспарланып отырғанын мәлімдеді.

"Министрліктің тәсілі эксперименттік әзірлемелерге емес, инфрақұрылымның сенімділігін арттыруға, апат деңгейін төмендетуге және шығынды оңтайландыруға бағытталған қолданбалы пилоттық жобаларды іске асыруға негізделген", - деп жазылған хабарламада.

Қазіргі уақытта салада үш негізгі практикалық кейс жүзеге асырылып жатыр:

1.

Ұшқышсыз ұшу аппараттарын қолдана отырып, электр беру әуе желілерін ЖИ-дефектоскопиялау. Компьютерлік көру және машиналық оқыту технологиялары 4K-камералар, жылу анықтау және лидар жүйелерінен алынған деректер негізінде тірек конструкциялары мен сымдардағы ақауларды, қызып кетулерді, деформацияларды және басқа да жасырын тәуекелдерді автоматты түрде анықтауға мүмкіндік береді.

2.

Акустикалық резонанс технологиясына негізделген жылу желілерінің роботтандырылған құбырішілік диагностикасы. Бұл шешім жүйені ашпай-ақ және тоқтатпай-ақ құбырлардың жай-күйін нүктелік бағалауды қамтамасыз етеді.

3.

Газ саласына арналған ЖИ-ассистент, ол мобильді қосымшада түсірілген фотосурет арқылы газ есептегіштердің көрсеткіштерін автоматты түрде таниды. Бұл адам факторын азайтып, есепке алудың дәлдігін арттырады.

"Аталған шешімдердің барлығы пилоттық режимде апробациядан өтіп, жоғары тиімділігін көрсетті: диагностика уақыты жеделдеді, апаттылық деңгейі төмендеді және ресурстарды үнемдеу айтарлықтай артты", - деп атап өтті ведомство.

2026 жылы Энергетика министрлігі электр және жылумен жабдықтау салаларында ЖИ-шешімдерді пилоттық кезеңнен ауқымды енгізуге көшіруді жоспарлап отыр.

Басым бағыттардың қатарында:

ЖИ-дефектоскопиядағы ақаулар классификаторларын кеңейту,

магистральдық құбыржолдарда құбырішілік диагностика технологияларын енгізу,

газ саласындағы цифрлық сервистерді одан әрі дамыту бар.