ЕО салығы: Қытайдан келетін шағын сәлемдемелер саны екі есеге жуық азайды

1 шілдеден бастап ЕО құны 150 еуродан аспайтын шағын сәлемдемелерге 3 еуро көлемінде баж салығын енгізді. Бұл шара өз нәтижесін бере бастады: импорт, әсіресе Қытайдан келетін тауар ағыны 30–40 пайызға азайған, деп хабарлайды Tengrinews.kz тілшісі Euronews басылымына сілтеме жасап.

Көптеген жыл бойы Shein, Temu немесе AliExpress платформаларынан тапсырыс берілген киім-кешек, аксессуарлар, гаджеттер мен күнделікті тұтыну тауарлары еуропалық тұтынушыларға тікелей және көбіне небәрі бірнеше еуроға жеткізіліп келді. Еуропалық Одақтың шешімдерінің арқасында бұл жүйенің қарқыны енді айтарлықтай бәсеңдеп отыр.

1 шілдеден бастап құны 150 еуроға дейінгі (қоса алғанда) сәлемдемелердің әр тауар санатына 3 еуро көлемінде бекітілген кедендік баж салығы салынады. Осы уақытқа дейін мұндай шағын жөнелтілімдер кедендік баждарды төлеуден босатылған болатын.

ЕО SHEIN, Temu және AliExpress пайдаланып келген салықтық саңылауды жойды. Нәтижесі көп күттірген жоқ. Экономика министрлігі бейсенбі күні жариялаған Франция кеденінің мәліметтеріне сәйкес, бұл шара енгізілгеннен бері Еуропалық Одаққа импортталатын шағын сәлемдемелер саны 30–40 пайызға азайған.

Франция үкіметі мұны қатаң ережелердің ірі қытайлық платформалардың жұмыс тәжірибесін өзгертуге қауқарлы екендігінің дәлелі деп санайды.

Маусым айынан шілдеге дейін Temu (–50 пайыз) және AliExpress (–37 пайыз) платформаларында сауда көлемі күрт төмендеді. Shein көрсеткіші әлдеқайда тұрақты (–15 пайыз), бұған 2025 жылдың соңында Польшада жаңа логистикалық қойманың ашылуы септігін тигізбек.

2025 жылы Еуроодаққа 5,9 миллиард арзан тауар, яғни күн сайын 16 миллионнан астам сәлемдеме келген. Брюссельдің пікірінше, мұндай жүйе шетелдік ірі платформаларға еуропалық саудагерлермен салыстырғанда басымдық беріп келген, ал жергілікті кәсіпкерлер тауар импорттау кезінде ортақ ережелерді сақтап, баж салығын төлеуге міндетті.

Еурокомиссия қауіпсіздік мәселелеріне де баса назар аударды. 2025 жылы ЕО-да жүргізілген зерттеуге сәйкес, тексеруден өткен арзан тауарлардың 60 пайыздан астамы еуропалық талаптарға немесе қауіпсіздік нормаларына сәйкес келмеген. Жаңа ережелер кеден қызметтеріне ықтимал қауіпті өнімдерді тиімдірек анықтауға мүмкіндік береді.

Дегенмен, тиімді болғанымен, бұл шара түпкілікті шешім емес. Ол Еуроодақтың кеден жүйесіндегі 2028 жылға жоспарланған ауқымды реформаның бастамасы болуға тиіс. Келесі қадам: қараша айынан бастап сәлемдемелерді өңдеуді қаржыландыруға арналған қосымша алымдар енгізілуі мүмкін.

Google News арқылы жаңалықтарымызды қадағалаңыз