Эпштейн ісі: Норвегияның дипломатиялық қызметіне сыртқы тексеру жүргізілмек

Норвегия парламентінің қадағалау комитеті елдің Сыртқы істер министрлігінің америкалық қаржыгер Джеффри Эпштейнмен байланысына қатысты сыртқы тергеу жүргізу туралы шешім қабылдады. Бұл туралы Интерфакс комитет төрағасы Пер-Вилли Амундсенге сілтеме жасап хабарлады.

Тергеу үшін арнайы комиссия құрылып, бүкіл дипломатиялық қызметтің жұмысы тексерілмек.

Бұған дейін Норвегияның экономикалық қылмыстарға қарсы басқармасы (Oekokrim) бұрынғы премьер-министр Турбьерн Ягландқа қатысты сыбайлас жемқорлық күдігімен тергеу бастаған болатын. Жарияланған құжаттарда Ягландтың халықаралық қызметте жүрген кезінде сыйлықтар, сапар шығындары мен қарыздар алғаны туралы деректер бар. Ол кезеңде Ягланд Нобель комитетінің төрағасы және Еуропа Кеңесінің бас хатшысы қызметін атқарған. Полиция Ягландты дипломатиялық иммунитетінен айыру туралы СІМ-ге сұрау жолдады.

Ягланд 1996–1997 жылдары Норвегия премьер-министрі, 2000–2001 жылдары Сыртқы істер министрі болған. 2009–2019 жылдары Еуропа Кеңесінің бас хатшысы, 2009–2015 жылдары Нобель комитетінің төрағасы қызметін атқарды.

Сонымен қатар, Давостағы Дүниежүзілік экономикалық форум ұйымдастырушылары ұйымның бас директоры, бұрынғы Норвегия СІМ басшысы Берге Бренденің Эпштейнмен байланысын анықтау үшін ішкі тергеу жүргізетінін мәлімдеді. Құжаттарға сәйкес, Бренде 2018–2019 жылдары Нью-Йоркте Эпштейнмен үш іскерлік кешкі асқа қатысқан және хат алмасқан. Ол сол кезде Эпштейннің қылмыстық өткенін білмегенін айтты.

Эпштейн 2008 жылы АҚШ-та кәмелетке толмағанды жезөкшелікке тартқаны үшін сотталған. 2019 жылы балаларды саудаға салу және жезөкшелікті ұйымдастыру айыптарымен қайта қамауға алынып, сол жылдың 10 тамызында түрмеде өлі күйінде табылды. Бұл іс оның көптеген ықпалды адамдармен байланысы болғандықтан әлемдік резонанс тудырды.

Бүгін, 13:07