Ерболат Дәукен Қытайдағы Халықтың ең жақсы дәрігері атағына ие болды шетелдегі қазақ баспасөзі

Иранның даму жолы: 1979 жылғы Ислам революциясынан кейінгі жетістіктері – Eurasia Today

1979 жылғы Ислам революциясынан кейін Иран бұрынғы жетістіктері мен тарихи мұрасын сақтаумен ғана шектелмей, ғылым мен білім беруді, экономиканы, денсаулық сақтауды және әлеуметтік саланы белсенді түрде дамытты.

Бұл туралы осы аптада Қырғызстанда шығатын Eurasia Today ақпарат агенттігі хабарлады.

Аталған БАҚ-тың келтірген деректеріне сүйенсек, Иран әлемдегі саяси жүйелердің ешқайсысына ұқсамайтын ерекше үшінші даму жолын таңдады. Бұл ұстаным «Батыс та емес, Шығыс та емес, Ислам Республикасы» деген ұранмен көрініс тауып, елдің толық саяси, экономикалық және мәдени тәуелсіздікке ұмтылысын білдірді.

Фото: Eurasia Today

Eurasia Today ақпарат агенттігінің мәліметінше, өткен жылдар ішінде Иран ішкі дамуында да, халықаралық аренада да елеулі табысқа қол жеткізді. Бүгінде ел әлемдік саясаттағы белсенді ойыншылардың бірі саналады және дербес, тәуелсіз сыртқы саясат жүргізіп жатыр. Тіпті, санкциялар мен халықаралық оқшаулау жағдайында да Иран өзін-өзі қамтамасыз ету деңгейіне жетіп, ішкі өндірісті айтарлықтай дамытты. Бұл сыртқы жеткізілімдерге тәуелділікті азайтып, экономикалық тұрақтылығын нығайтуға мүмкіндік берді.

Сонымен қатар, осы аптада Eurasia Today ақпарат агенттігінде «Ирандық ғалымдар жүрек тінінің өздігінен жиырылатын 3D-моделін жасады» деген тақырыптағы ақпарат жарық көрді.

Фото: eurasiatoday

Ирандық ғалым Хуман Савджи жетекшілік еткен зерттеу тобы зертханада адам жүрек тінінің үшөлшемді моделін жасаған.

Eurasia Today хабарлауы бойынша, оның ерекшелігі шынайы ағзаның жұмысын қайталайтын, өздігінен жиырылу қабілетіне ие болуында.

Жаңа әзірлеменің басты артықшылығы — нақты уақыт режимінде механикалық деректерді үздіксіз әрі жоғары дәлдікпен жинау мүмкіндігі. Бұл оны қазіргі қолданыстағы көптеген әдістен ерекшелейді.

Сондай-ақ аталған технология аурулардың шынайы үлгілерін жасауға және емдеу әдістерін клиникаға дейінгі сынақтан дәлірек әрі қауіпсіз өткізу үшін өте маңызды қадам саналады.

— Қазіргі уақытта ғалымдар жүрек-қантамырлар патологияларының арнайы модельдерін жасау бағытында белсенді жұмыс істеп жатыр. Олардың қатарында дилатациялық кардиомиопатия, яғни жүрек қуыстарының ұлғаюы салдарынан оның қанды дұрыс айдай алмауы және аритмияның әр түрі бар, — деп жазады Eurasia Today.

Ташкентте Орталық Азия ғалым әйелдерінің халықаралық форумы өтті — ӨзА

11 ақпан — Ғылымдағы әйелдер мен қыздардың халықаралық күніне орай Ташкент қаласында «SheSCIENCE 2026» Орталық Азия ғалым әйелдерінің халықаралық форумы өтті.

Форум Өзбекстан Республикасы Ғылым академиясы, Жоғары білім, ғылым және инновациялар министрлігі, Отбасы және әйелдер комитеті, Азия даму банкі және TWAS — Дүниежүзілік ғылым академиясының ынтымақтастығымен ұйымдастырылды.

Фото: ӨзА

Бұл туралы «ӨзА» ақпарат агенттігі мәлімдеді.

Хабарламада айтылғандай, іс-шараға мемлекеттік басқару органдары, халықаралық ұйымдар, ғылыми мекемелер мен жоғары білім беру жүйесінің өкілдері, сондай-ақ Қазақстан, Қырғызстан, Тәжікстан, Түрікменстан және Өзбекстаннан 200-ге жуық ғалым әйел қатысты.

Атаулы форумға қатысқан Өзбекстан Республикасы Премьер-министрінің орынбасары — Отбасы және әйелдер комитетінің төрайымы Зулейха Махкамова, Жоғары білім, ғылым және инновациялар министрі Қунғиратбай Шарипов, Ғылым академиясының президенті, Өзбекстан Қаһарманы Шавкат Аюпов елімізде әйелдердің ғылым саласындағы белсенділігін қолдауға басымдық беріліп отырғанын атап өтті.

Сонымен қатар, Азия даму банкінің Өзбекстандағы өкілдігінің директоры Канокпан Лао-Арая мен TWAS вице-президенті Сабах Ал-Мумин Орталық Азиядағы ғалым әйелдердің ғылыми қызметін қолдау, гендерлік теңдікті қамтамасыз ету және халықаралық ғылыми ынтымақтастықты дамыту мәселелері талқыланды.

Сондай-ақ, осы аптада «ӨзА»-да «Өзбекстанда дәрі-дәрмек бағасы арзандайды» деген тақырыптағы ақпарат жарияланды. 

Фото: Денсаулық сақтау министрлігі

Аталған ақпарат көзінің дерегінше, 2026 жылдың 1 наурызынан бастап Өзбекстанда бірқатар дәрі-дәрмектің бағасы 40–60 пайызға арзандайды. Ал 1 шілдеден бастап тағы 4 мыңға жуық атаудағы дәрілік заттың бағасын төмендету жоспарланып отыр.

Бұл туралы Фармацевтика саласын дамыту агенттігінің ақпарат қызметінің басшысы Анвархан Акабиров мәлімдеді.

Оның айтуынша, 2025 жылы республикада жалпы құны 136 млн АҚШ долларын құрайтын 48 жаңа жоба іске қосылып, 2441 жаңа жұмыс орны ашылған. Жобалар аясында 392 млн доллар инвестиция игерілген, оның 92 пайызы — шетелдік инвестициялар. Бұл өткен жылмен салыстырғанда 2,3 есеге көп.

Өңірлерде жалпы құны 878 млн доллар болатын 39 жоба жүзеге асырылып жатыр. Соның ішінде «Tashkent Pharma Park» фармацевтикалық кластерінде 407 млн долларлық 13 жоба орналастырылған.

— Қазіргі таңда фармацевтикалық кластердегі жобалар саны 32-ге жетіп, олардың жалпы құны 981 млн долларды құрап отыр. Оның ішінде 1 жоба іске қосылған, 20 жобада құрылыс, 11 жобада жобалау жұмыстары жүргізіліп жатыр. Республикадағы фармацевтикалық еркін экономикалық аймақтарда құны 9,4 млн доллар болатын 5 жоба пайдалануға беріліп, қосымша 98,9 млн долларлық 17 инвестициялық жоба орналастырылды, — деп жазады өзбекстандық БАҚ.

Ерболат Дәукен «Халықтың ең жақсы дәрігері» атағына ие болды — CNR

1 қаңтар күні Бейжіңде 10-кезекті «Халықтың жақсы дәрігерін» марапаттау рәсімі өтті. Шара «2024–2025 жылдардағы халықтың қалаулы дәрігерлерінің игі істерін насихаттау» тақырыбы аясында ұйымдастырылды.

Бұл туралы Қытайдың «Орталық халық радиосы» хабарлады. 

Фото: CNR

Аталған БАҚ-тың дерегінше, биылғы жиын «10 жылдық тағылым, халық игілігі жолындағы дәрігерлік» ұранымен өтіп, әлеуметтік маңызы бар жобаның он жылдық қорытындысы шығарылды.

Сондай-ақ, жаңа дәуір жағдайында халық денсаулығын қорғауға үлес қосқан үздік медицина қызметкерлері марапатталды.

Қытайдың «Орталық халық радиосы» хабарлауынша, осы марапатқа Шыңжаң өлкесі, Іле Қазақ автономиялық облысы Қорғас қалалық халық ауруханасының патология бөлімінің аға дәрігері Ерболат Дәукен лайық деп танылған.

Көктем мерекесі тасымалының бірінші аптасында адамдардың аймақаралық қозғалысы 1,4 млрд-тан асты — «Халық газеті»

Көлік министрлігінің мәліметтері көрсеткендей, 8 ақпанда, яғни Көктем мерекесі тасымалының жетінші күнінде, бүкіл қоғамдағы адамдардың аймақаралық қозғалысы 224,28 миллионды құрады, бұл өткен жылдың сәйкес кезеңімен салыстырғанда 0,8%-ға өсті. Көктем мерекесі тасымалының бірінші аптасында бүкіл қоғамның аймақаралық қозғалысы 1,413227 млрд жолаушыны құрайды деп күтіліп отыр. Орташа есеппен тәулігіне 201,89 млн жолаушы, бұл өткен жылдың сәйкес кезеңімен салыстырғанда 2%-ға өскен, деп хабарлайды «Халық газеті» басылымы. 

Фото: Халық газеті

Аталған БАҚ-тың дерегіне сүйенсек, теміржол арқылы жолаушылар тасымалы 86,023 млн жолаушыны құрайды деп күтіліп отыр, тәулігіне орташа есеппен жолаушылар ағыны 12,289 миллионды құрайды, бұл өткен жылдың сәйкес кезеңімен салыстырғанда 0,2%-ға жоғары.

Ал су жолындағы жолаушылар ағынының жалпы көлемі 4,891 млн, күніне орта есеппен 699 000 жолаушы тасымалданады, бұл өткен жылдың сәйкес кезеңімен салыстырғанда 14,7%-ға жоғары. Азаматтық авиацияның жолаушылар ағыны 16,323 млн жолаушы, тәулігіне жолаушылар ағыны 2,332 млн жолаушыны құрайды, бұл да өткен жылдың сәйкес кезеңімен салыстырғанда 6,1%-ға жоғары.

Айта кетейік, биыл Көктем фестивалінде жеке автокөлікпен сапарлау негізгі бағытқа айналған.

Сондай-ақ осы аптада «Халық газеті» басылымында «Биыл Қорғас теміржол порты арқылы өткен пойыздардың саны 1000-нан асты» деген тақырыптағы ақпарат жарияланды. 

Фото: Халық газеті

Аталған БАҚ-тың дерегінше, Қытай теміржолы Үрімжі бөлімшесінен алған ақпаратқа сәйкес, 9 ақпандағы жағдай бойынша 2026 жылы Қорғас теміржол порты арқылы 1000-нан астам Қытай-Еуропа (Орталық Азия) пойызы өткен.

Қазір Қорғас теміржол порты арқылы 91 теміржол желісі бар, пойыздар 18 елдің 46 қаласы мен аймағына жетеді. Пойыздардың тәулігіне орташа жөнелтілімі 27-ден асады.

Сонымен қатар 10 ақпан күні «Халық газеті» басылымында «Хунаньнан Қазақстанға жоғары сапалы көкөністер экспортталды» деген тақырыптағы ақпарат жарық көрді. 

Фото: Халық газеті

Келтірілген деректерге сүйенсек, 9 ақпанда Хунань өлкесінің Юэян қаласындағы Цзюньшань көкөніс ғылыми- технологиялық паркінен көкөніс тиелген тоңазытқыш жүк көлігі Қазақстанның Алматы қаласына бет алған.

Қытайлық БАҚ-тың мәліметінше, Дунтин көлінің жағасынан алынған 22 тонна көкөніс партиясы Қытайдың ұлттық географиялық көрсеткіш өнімдері саналатын «Гуансинчжоу қытай қырыққабаты» және «жалпақ қырыққабаттан» тұрады. Көкөністер төрт күн ішінде Алматыға жетеді.

Юэянның Цзюньшань аумағы Қытайдағы маңызды көкөніс өндірісі базасы және Хунань өлкесіндегі негізгі «көкөніс себеті» аймағы болып есептеледі. Онда 180 000 му (1 200 600 сотық — авт.) көкөніс базалары бар.

Ирандық зерттеушілер іргелі физика бойынша әлемдік сыйлықтың жеңімпаздары қатарында — ParsToday

Ирандық зерттеушілер іргелі физика бойынша әлемдік сыйлықтың жеңімпаздары қатарында.

Атап айтқанда, 2025 жылға арналған іргелі физика саласындағы беделді Breakthrough сыйлығы Еуропалық ядролық зерттеулер ұйымының (CERN) CMS халықаралық ынтымақтастығына берілді. Бұл жаһандық сыйлық табиғаттың құрылымын ең аз көлемде тереңірек түсінуге әкелген сирек кездесетін процестерді зерттеудегі осы ғылыми ынтымақтастықтың көрнекті жетістіктерін мойындау ретінде берілді, деп жазды ParsToday ақпарат агенттігі. 

Фото: ParsToday

Ирандық БАҚ-тың мәліметі бойынша, Иранның іргелі ғылымдар институтының бөлшектер мен үдеткіштерді зерттеу институтының зерттеушілері CMS ынтымақтастығының белсенді мүшелері ретінде осы беделді халықаралық марапатқа ие болғандардың қатарында болды. Бұл құрмет әлемдегі ең озық ғылыми зертханалардың бірінде CMS Iran командасы мүшелерінің жылдар бойы үздіксіз ғылыми, техникалық және атқарушылық күш-жігерінің нәтижесі саналады.

Халықаралық жас кәсіпкерлер конгресі Ыстанбұлда өтті — TRT

Президент аппараты жанындағы Инвестициялар және қаржы кеңсесінің басшысы Бурак Дағлыоғлу мемлекет барлық мүмкіндіктері мен саясаттары арқылы кәсіпкерлерді қолдайтынын тілге тиек еткен. Оның айтуынша, өткен жылы, тек 2025 жылдың өзінде елде тек ерте кезеңдегі технологиялық стартаптарға шамамен 700 млн доллар инвестиция салынған.

Бұл туралы осы аптада Түркия Радио Телевизия порталы хабарлады.

Фото: TRT

«TRT»-ның дерегінше, «Жас MÜSİAD» ұйымы екі жылда бір рет өткізетін Халықаралық жас кәсіпкерлер конгресі (UGİK’26) «Болашақ бүгін» тақырыбымен басталды.

Ашылу салтанатында Президент аппараты жанындағы Инвестициялар және қаржы кеңсесінің басшысы Дағлыоғлу, Тәуелсіз өнеркәсіпшілер мен кәсіпкерлер қауымдастығының (MÜSİAD) басшысы Бурхан Өздемир, «Жас MÜSİAD» төрағасы Магсум Уста және UGİK атқару комитетінің төрағасы Өмер Фарук Челик сөз сөйледі.

«Жас MÜSİAD» төрағасы Уста іскерлік әлемінде шынайы өзгеріс әкелетіндер ең жақсы тыңдай білетіндер екенін айтты.

Магсум Уста жаңа буынның өте қабілетті екенін, тез үйренетінін, батыл әрі өзіне сенімді екенін, бірақ тәжірибеде жиі кездесетін кемшіліктің шыдамсыздық екенін баса айтқан.