Ғ. Жұбанова квартеті Карнеги холда өнер көрсетті

Қазақстан өнерпаздары АҚШ-тың басты сахнасында өнер көрсетті.

Еркеғали Рахмадиев атындағы мемлекеттік академиялық филармония құрамына кіретін Ғазиза Жұбанова атындағы мемлекеттік квартет әйгілі Карнеги Холда еліміздің төл музыкасы мен батыстың классикалық шығармаларын орындады. 30 жылдық мерейтойы аясында халықаралық турнеде жүрген өнер ұжымы Нью-Йорк тұрғындары мен қонақтарын ерекше орындау тәсілімен тәнті етті.

Чайковский, Рахманинов, Битлз, Фрэнк Синатра сынды ән әлемінің аңыздары өнер көрсеткен Карнеги Холда бүгін қазақстандық өнерпаздар өз өнерін паш етеді. Саз әлемінің саяхатын ұйымдастыратын Еркеғали Рахмадиев атындағы мемлекеттік академиялық филармония құрамына кіретін Ғазиза Жұбанова атындағы мемлекеттік квартет болмақ.

Ақан серінің «Қара торғайы». Сол әуеннің қанатында қалықтап келіп, сайын даланың сазымен өнер ұжымы сырлы саяхатқа бастап әкетті. «Қара торғай» тыңдарманды елітіп, батысқа қарай алып ұшты. Моцарттың шығармасымен қызықтырып, Брамсқа жалғады. Бірде кәрі құрлықтың аспаптары байырғы тегінің ізімен қобыз болып сарнады.

Карнеги холдың камералық залына жиналған қауым осылайша Қуат Шілдебаевтың квартетке арналған шығармаларын да тыңдады. Ұлттық музыка америкалық қауымның да, концертке арнайы келген Қазақстан диаспорасы өкілдерінің де көңілінен шығып, ұмытылмас әсер сыйлады.

Аннетт Хайрапетян, БҰҰ Әйелдер гильдиясының президенті:

- Бүгінгі концерттен алған әсерім ерекше. Квартеттің талантына қайран қалдым. Өз істерінің маманы екені бірден көрініп тұрды. Карнеги Холға осындай талантты қазақ өнерпаздары келе берсе екен деген тілегім бар.

Кинталь Исламов, «Атамекен-агро» басқарма төрағасы:

- Жігіттерді бұрыннан тыңдап келе жатырмын. 25 жылдан асқан сияқты. Әрқашан қолдау танытып келеміз. Себебі Қазақстан өнерінің дәріптелуіне зор еңбек сіңіріп келе жатыр. Олардың арқасында Құрманғазы, Ғазиза Жұбанова сынды күйші-композиторлардың шығармалары квартетке бейімделіп, жаңа бір демге ие болды. Құлақтан кіріп, бойды алатын музыкамыз жайлы, өнерпаздарымыз жайлы барша әлем білуі керек деп есептеймін.

Ғалия Тілеуова, тыңдарман:

- Қазақстанның тумасы ретінде Карнеги холда жерлестерімнің өнер көрсеткенін көріп, өте қуанып тұрмын. Өне бойымыз шымырлап, әр шығармада ерекше сезімге бөлендік. Моцарттың да, Қуат Шілдебаевтың да бай мұрасына куә болдық.

30 жылдық мерейтойы аясында Париж бен Мадридте концерт берген квартет мұхит асып, әйгілі Карнеги холл сахнасына жетуін мансабының басты белесі деп біледі.

Ернар Мыңтаев, квартет мүшесі:

- Әр музыканттың өзінің бала кезден арманы - осындай атақты сахнаға шығу. Енді мына біздің квартеттің 30 жылдығын атап жатырмыз. Сол 30 жылда осы сахнаға жеттік, арманымыз бір жағынан орындалған сияқты. Енді бұл тек біздің арман ғана емес, біздің еліміздің мәдениетін көрсету, сол арманымыз. Бір ерекше сезім, ерекше шабыт келіп тұр.

Нью-Йорктегі талғампаз көрерменнен, тарихи сахнадан ерекше қуат алып, шабыттанып тұрған квартет өз гастролін Чарльзтаун, Филадельфия, Бостон қалаларында жалғастырады.

Авторлары: Ердана Ержанұлы, Эндрю Фанг