Газада құрылатын халықаралық күшке қай елдерден әскерилер тартылады

Вашингтонда Дональд Трамптың жоспарын іске асыру аясында Газа секторының қауіпсіздігін қамтамасыз ету үшін халықаралық күштердің құрылуына дайындық басталды. Бұл туралы бейсенбі күні Reuters агенттігі АҚШ президентінің екі аға кеңесшісіне сілтеме жасап мәлімдеді.

Басылым дереккөзінің айтуынша, 20 тармақтан тұратын «Трамптың Газаға қатысты жоспарының» негізгі шарты - АҚШ-тың қолдауымен халықаралық тұрақтылық орнату күшін құру.

Вашингтон миссияны үйлестіру мен қолдау үшін 200 әскери қызметшіні жібере алатынын мәлімдеді. Алайда олар анклавтағы іс-әрекеттерге тікелей қатыспауы тиіс.

— Қазір біздің мақсат - жалпы жағдайды тұрақтандыру. Халықаралық тұрақтылық орнату күшін құру қазірдің өзінде қолға алынған, - деді кеңесшілердің бірі.

Кеңесшілердің айтуынша, бірқатар мемлекеттермен келіссөз жүргізіліп жатыр. Олардың ішінде Индонезия, БАӘ, Мысыр, Қатар және Әзербайжан секілді елдер бар.

Politico басылымының мәліметі сүйенсек, Индонезия, Әзербайжан және Пәкістан елдері Газа секторының қауіпсіздігін қамтамасыз ету миссиясына негізгі үміткерлер ретінде қарастырылып отыр.

Қазірге дейін ешбір мемлекет әлі ресми түрде әскери контингент жіберуге ниетті екенін хабарлаған жоқ. Алайда Индонезия бұған дейін БҰҰ бітімгерлік миссиясы құрамында 20 мың әскери қызметші жіберуге дайын екенін айтқан.

Кеңесшілердің айтуынша, аймақта қазір шамамен 20 америкалық әскери қызметші бар, олар үйлестіру және бақылау функцияларын атқарып отыр.

— Біз өңірді тұрақтандыру ісіне аймақтағы әр ресурс пен әрбір серіктесімізді барынша жұмылдырғымыз келеді, - деді кеңесші.

Ол сонымен бірге анклав тұрғындарының ешқайсысы күштеп көшірілмейтінін, қайта құру жұмыстарын ХАМАС-тың қарулы күштері жоқ аудандарда жүзеге асыру жоспарланғанын айтты.

АҚШ-тың бұрынғы президенті Трамп Газа секторын толық қалпына келтіру жоспарын жариялаған, бірақ бұл процеске біраз уақыт керек.

Сонымен қатар, израильдік тұтқындардың мәйітін шығару жұмысы қирандылар мен жарылмаған оқ-дәрілердің кесірінен созылып кетуі ықтимал.
Айта кетейік, Израильдің қорғаныс министрі Газада атыс қайта жалғасуы мүмкін екенін мәлімдеді.

Сондай-ақ бұған дейін Израиль Газа секторына 45 палестиндіктің мәйітін тапсырғанын хабарлаған едік. 
Камила Мүлік