Гималайдағы жойқын су тасқынынан кейін жаңа көл пайда болды, ол арнасынан асып кетуі мүмкін

Непал мен Қытайда жаңа алып бөгет көлінің пайда болуына байланысты су тасу қаупі туындады. Су арнасынан асып кетуі мүмкін, деп хабарлайды Tengrinews.kz қытайлық БАҚ-қа сілтеме жасап.

Үйінді астында қалған аңғарлар мен беткейлерде іздестіру-құтқару жұмыстары жалғасып жатыр. Сәрсенбіде Непал мен Қытайдың Тибет шекаралас аймақтарында болған су тасқынынан кейін 1000-ға жуық адам әлі де хабар-ошарсыз кеткендер тізімінде. Табиғи апат кем дегенде 362 адамның өмірін қиған.

Екі ел де су тасқынына мұздықтың құлауы себеп болғанын түсіндірді, соның салдарынан тастар, мұз бен лай таулардағы өзен жүйелеріне түсіп, жойқын тасқынға әкеп соқтырған.

Екі ірі өзеннің түйіскен жерінде жаңа көл пайда болды. Бөгет қайтадан су тасқынына себеп болуы мүмкін деп ескертті қытайлық БАҚ.

Қытай мен Непалдағы кешегі су тасқынының спутниктен және жерден түсірілген кейбір кадрлары адам сенгісіз.
Мына "дейін және кейін" суреттері — бүгін #vantortech жариялаған көптеген материалдардың бірі ғана.
Егер деректер нақты болса, бұл апаттан қаза тапқандар саны мыңдап саналуы мүмкін.
Жоспар... pic.twitter.com/SjuMMwJBGS

— Mrgunsngear (@Mrgunsngear) 27 тамыз, 2026

Бейсенбіде Непалдың табиғи апаттармен күрес басқармасы өзен арнасын бөгеп тастаған үйінділерден пайда болған көлде су деңгейі көтеріліп жатқанын және оның жарылу қаупі бар екенін хабарлады.

"Төменгі ағыс тұрғындарынан, жолаушылардан, құтқару жұмыстарына қатысып жатқан мамандардан және барлық мүдделі тұлғадан ерекше сақ болуды, өзен жағалаулары мен қауіпті аймақтардан алыс, қауіпсіз жерлерде болуды сұраймыз", - делінген Непал билігінің мәлімдемесінде.

Қытай тарапы алдағы үш күнде шекараның өз жағындағы бөгелген көлге 3 миллион текше метр су құйылады деп күтілетінін, бұл бөгеттің жарылу қаупін тудыратынын ескертті. Судың ең жоғарғы ағыны шамамен 1 қыркүйекте болады деп болжанады.

Еске сала кетейік, Непалдағы жойқын су тасқынынан кейін Қазақстан азаматы жоғалып кеткен болатын. Қазақстан Сыртқы істер министрлігінің алдын ала мәліметінше, ол Непалдан Қытайға шекара асқан туристік топтың құрамында болған.

Президент Қасым-Жомарт Тоқаев Сицзан автономды ауданындағы жойқын селдің қайғылы салдарына байланысты ҚХР Төрағасы Си Цзиньпинге көңіл айту жеделхатын жолдады.

Google News арқылы жаңалықтарымызды қадағалаңыз