Грузиядағы тәртіпсіздікке қатысқандар саны 39 адамға жетті

Бұл туралы елдің ішкі істер министрінің орынбасары Александр Дарахвелидзе брифинг барысында мәлімдеді.

— Тергеу аясында жүргізілген кешенді жедел және тергеу іс-шаралары нәтижесінде құқық қорғау органдары тағы сегіз адамды ұстады. Тағы төртеуі іздеуде, — деді ол.

Дарахвелидзенің айтуынша, наразылық білдірушілер президент резиденциясын басып алмақ болған кезде полиция қызметкерлерін қорлап, оларға тас және ауыр заттар лақтырған. Осылайша, жалпы ұсталғандардың саны 39 адамға жетті.

Еске сала кетейік, 4 қазан күні, жергілікті сайлау өтетін күні, Тбилиси орталығындағы президент сарайының маңында жаппай наразылық акциясы өтіп, ол полициямен қақтығысқа ұласқан болатын.

Демонстранттар президент сарайын қоршаған тосқауылды бұзып өтті, алайда арнайы жасақ су атқыш пен көзден жас ағызатын газ қолдана отырып, оларды кері шегіндірді.

Полиция билікті құлатуға шақыру және топтық зорлық-зомбылық ұйымдастыру айыбымен наразылық бастамашыларының бесеуін ұстады. Оларға тоғыз жылға дейін бас бостандығынан айыру жазасы қаупі төніп отыр.