Қазақстанның солтүстігіндегі жол апатынан балабақша директоры мен тәрбиешілер қаза тапты

Солтүстік Қазақстан облысындағы жан түршігерлік жол апатынан білім беру саласының қызметкерлері - балабақша меңгерушісі мен екі тәрбиеші қаза тапты, деп хабарлайды Tengrinews.kz тілшісі.

Адам өліміне әкеп соққан жол апаты 15 қазан күні таңертең Тайынша ауданы Кременчуг ауылының маңында болған. Онда екі жеңіл көлік, жол талғамайтын көлік және екі КамАЗ соқтығысқан. Audi автокөлігі ең ауыр зақым алды: ол КамАЗ-дың астына кіріп кетіп, екінші жүк көлігінің соққысынан мүлдем жарамсыз болып қалған.

Полиция көлік құралын басқаратын адамдардың жол қозғалысы ережелерін бұзып, абайсызда екі немесе одан да көп адамның өліміне әкеп соғу дерегі бойынша сотқа дейінгі тергеу амалдарын жүргізіп жатыр.

"Жол-көлік оқиғасы Көкшетау-Петропавл тасжолының 371-шақырымында болды. Нәтижесінде жеңіл көліктің үш жолаушысы алған жарақаттарынан қайтыс болды. Алдын ала мәліметтер бойынша, кенеттен жер бауырлаған құрғақ тұман түсіп, көріну деңгейінің нашарлауына байланысты жеңіл көлік екі жүк көлігінің арасында қысылып қалған", - деп түсіндірді Тайынша аудандық полиция бөлімінің бастығы Дәурен Ибраев.

Ол жүргізушілерді жылдамдық режимін және қауіпсіз арақашықтықты сақтауға шақырды.

"Тұман, көктайғақ және көріну шектелген кезде жылдамдықты азайтып, жолда барынша сақ болыңыздар", - деп атап өтті Дәурен Ибраев.

Апаттан 48, 54 және 57 жастағы үш әйел көз жұмды. 20 жастағы жүргізуші мен 1972 жылы туған тағы бір жолаушы әйел ауруханаға жатқызылды.

Олардың жағдайы туралы облыстық денсаулық сақтау басқармасы мәлімдеді.

"Зардап шеккендерді Төтенше жағдайлар департаментінің қызметкерлері Тайынша көпбейінді аудандық ауруханасына жеткізді. Жүргізуші хирургия бөлімінде жатыр, жағдайы тұрақты. Оған ми шайқалуы диагнозы қойылды, бір жақ өкпесі қысылып қалған еді, қазір ол оңалып жатыр. Зардап шеккен әйел отадан кейін жансақтау бөлімінде жатыр, жағдайы ауыр, тұрақсыз. Науқастың жабық бас сүйек-ми жарақаты бар, миы шайқалған. Ішкі мүшелері зақымданғандықтан, оған шұғыл ота жасалды", - деді ведомствоның баспасөз хатшысы Гүлнар Сайлау.

Ол науқастардың дәрігерлердің бақылауында екенін және барлық қажетті көмек көрсетіліп жатқанын айтып қорытындылады.

Солтүстік Қазақстан облысының білім басқармасы апаттан Жамбыл ауданының білім беру саласының қызметкерлері - балабақша меңгерушісі мен екі тәрбиеші қаза тапқанын хабарлады.

"Қолда бар мәліметтер бойынша, сапар жеке мақсатта болған және қызметтік міндеттерді орындаумен байланысты емес. Бұл - марқұмдардың отбасылары, әріптестері мен оларды танитын жандардың барлығы үшін орны толмас қаза. Жақындары мен туыстарының қайғысына ортақтасып, көңіл айтамыз", - деп атап өтті ведомство.

Бізді Google-дың негізгі дереккөздер тізіміне қосыңыз