ҰБТ ның жаңа форматы таныстырылды: қандай өзгеріс болады

АЛМАТЫ, 15 қазан – Sputnik. Ұлттық тестілеу орталығының директоры Нұрсейіт Байжанов Ұлттық бірыңғай тестілеудің (ҰБТ) жаңа форматын таныстырды, деп хабарлады Ғылым және жоғары білім министрлігі.

Qazaq AI Research University университетінде өткен Жоғары білім қызметкерлері күніне арналған форумда Ұлттық тестілеу орталығының директоры орталықтың халықаралық ETS ұйымымен бірлесіп жүзеге асырып жатқан Admission Insight Test (AIT) жобасы туралы баяндады.

Жоба 2026 жылғы ақпанда басталып, 2030 жылға дейін жалғасады. Оның мақсаты – білім беру жүйесіндегі өзгерістер мен қазіргі заман талаптарын ескере отырып, қабылдау емтихандары мен бағалау тәсілдерін жаңарту.

"Білім енді тапшы ресурс емес. Тапшы ресурсқа айналғаны — пайымдау қабілеті. Білімді қайта жаңғыртуды тексеретін емтихан бүгінде жасанды интеллект талапкерге қарағанда әлдеқайда жылдам орындайтын әрекетті бағалайды. Сондықтан қабылдау жүйесін реформалау – бүкіл білім беру жүйесін өзгертудің ең пәрменді тетіктерінің бірі. Қабылдау моделі өзгерген кезде онымен бірге бүкіл жүйе де өзгере бастайды", - деді Нұрсейіт Байжанов.

AIT емтиханы екі негізгі бөліктен тұрады:

1. Пәндік тестілер

Тест 14 бейіндік пән бойынша өткізіледі. Тапсырмалар мемлекеттік білім беру стандарттарына сәйкес жаңартылып, ақпаратты жаттап алу мен қайталаудан гөрі оқу материалын терең түсінуге басымдық беріледі.

2. Дағдыларды бағалау тесті

Бұл бөлім талапкерлердің негізгі дағдыларын бағалауға арналған бес модульді қамтиды. Атап айтқанда, сыни ойлау, академиялық жазылым және зерттеу дағдылары, коммуникациялық қабілеттер, жасанды интеллектіні пайдалану сауаттылығы, сандық және цифрлық сауаттылық, сондай-ақ креативті және дизайндық ойлау қабілеттері бағаланады. Соңғы модуль әзірлену үстінде.

Жаңа форматты әзірлеу барысында ашықтықты қамтамасыз етуге де ерекше назар аударылған. 2026 жылғы сәуірде Ұлттық тестілеу орталығы мен ETS бірлесіп, шамамен 4 мың респонденттің қатысуымен зерттеу жүргізді. Сонымен қатар сегіз фокус-топ пен Астана қаласында төрт тереңдетілген талқылау ұйымдастырылды.

Жаңа қабылдау жүйесін әзірлеу кезінде жоғары оқу орындарының, оқытушылардың және білім беру саласындағы басқа да қатысушылардың пікірлері ескеріледі.