Ұлттық банк қазақстандықтардың зейнетақы активтерінің бір бөлігін компанияларға береді: 2030 жылға дейінгі бағдарлама

2030 жылға қарай жекеменшік отандық компаниялардың басқаруындағы зейнетақы активтерінің үлесін 20-30 пайызға жеткізу жоспарлануда. Бұл туралы халықаралық инвесторлармен кездесуде Қаржы нарығын реттеу және дамыту агенттігі (ҚНРДА) төрағасының орынбасары Нұржан Тұрсынханов мәлімдеді, деп хабарлайды Tengrinews.kz Агенттік сайтына сілтеме жасап.

Тұрсынханов өз сөзінде ҚНРДА Ұлттық банкпен бірлесіп әзірлеген Капитал нарығын дамытудың 2030 жылға дейінгі бағдарламасының негізгі бағыттарын таныстырды.

Бағдарлама бизнес үшін қаржыландыру тарту мүмкіндіктерін кеңейтуге, құнды қағаздарға деген тұрақты ішкі сұранысты қалыптастыруға, нарық өтімділігін арттыруға және инвесторларды қорғауды күшейтуге бағытталған.

Негізгі бағыттардың бірі жекеменшік отандық компаниялардың зейнетақы активтерін басқаруға қатысуын кеңейту болмақ.

"Ұлттық банктің зейнетақы портфелінің бір бөлігін мемлекеттік құнды қағаздардан бастап, конкурстық негізде лицензиясы бар басқарушы компанияларға кезең-кезеңімен беру қарастырылған. Сонымен қатар тәуекелдерді басқаруға, ішкі бақылауға және ақпаратты ашуға қойылатын бірыңғай талаптар белгіленеді, ал активтер басқарушылардың өз қаражатынан бөлек тәуелсіз кастодианда сақталады. 2030 жылға қарай жекеменшік отандық компаниялардың басқаруындағы зейнетақы активтерінің үлесін 20-30 пайызға жеткізу жоспарланып отыр", - делінген жарияланымда.

Анықтама: Кастодиан (немесе кастодиан-банк) - бұл клиенттерінің құнды қағаздарын, ақшалай қаражатын және басқа да қаржылық активтерін сақтауға, есепке алуға және қорғауға жауапты мамандандырылған қаржы институты (әдетте ірі банк).

Бұған дейін Қазақстанда міндетті зейнетақы жарналары (МЗЖ) бойынша жинақтаушы зейнетақы жүйесіне қатысу өтілін есепке алу ережелері нақтыланып жатқаны хабарланған болатын. Жаңа түзетулер еңбек өтілін есептеу кезіндегі даулы тұстарды жоюға тиіс. Толығырақ: сілтеме бойынша оқыңыз.

Тағы оқыңыз: Қазақстанда зейнетақы мен жәрдемақы индекстеледі: бюджеттен қанша қаражат бөлінеді?

Бізді Google-дың негізгі дереккөздер тізіміне қосыңыз