Алматыда 2030 жылға дейінгі кәсіпкерлік бағдарламасы бекітілді

Алматы қаласының мәслихаты жаңа өңірлік Almaty Business  – 2030 бағдарламасын бекітті.
Бағдарлама шағын және орта бизнесті қолдауға, жеңілдетілген қаржыландыруға қолжетімділікті арттыруға және қалаға инвестиция тартуға бағытталған.

Бағдарламаның негізгі жаңалықтары: Әлеуметтік кәсіпкерлікке кепілсіз несие: «Алматы» микро қаржы ұйымы арқылы жылдық 6% мөлшерлемемен 5 жылға дейін несие алу мүмкіндігі қарастырылған. Несие лимиттері: негізгі құрал-жабдыққа – 5,6 млн теңге, айналым қаражатына – 2,2 млн теңге.

Жеңілдетілген мөлшерлемелер: 6% мөлшерлеме әлеуметтік кәсіпкерлерге, шағын өнеркәсіп парктерінің тұрғындарына, креативті және инновациялық жобаларға қолданылады. Басқа шағын және орта бизнестерге жылдық 9% мөлшерлеме белгіленген.

Қысқа мерзімді несиелер: «Алматы» микро қаржы ұйымы 12 айға дейін, жылдық 12% мөлшерлемемен, 6,5 млн теңгеге дейін несие беруді жалғастырады.

Инвестициялық жобаларға қатысу: Серіктестік келісімдер арқылы жер учаскелерін қысқа мерзімді жалға беру және инвесторларды конкурс арқылы таңдау қарастырылған.

Бағдарлама 2030 жылға дейін қаланың экономикалық әлеуетін нығайтуға, жұмыс орындарын құруды қолдауға бағытталған. Бұған дейінгі бағдарлама аясында 6,4 мың жұмыс орны ашылған.