ТМД саммитінде 2030 жылға дейінгі әскери ынтымақтастық тұжырымдамасы бекітілді

ТМД мемлекеттерінің басымдықтарына сәйкес, әскери саладағы ынтымақтастық ашық, болжамды және дәйекті түрде бейтарап сипатқа ие, сондай-ақ үшінші елдерге қарсы бағытталмаған.

ТМД аясындағы көпжақты әскери ынтымақтастық өзара сенімді нығайту, қауіпсіздіктің бөлінбестігі, тең құқықты тату көршілік қатынастарды дамытуға бағытталған. Сонымен қатар ол өзге елдермен және халықаралық ұйымдармен ынтымақтаса отырып, халықаралық бейбітшілікті, өңірлік тұрақтылықты және әрбір ТМД мемлекетінің қауіпсіз дамуын қамтамасыз етуге бағытталады.

Әскери саладағы ынтымақтастықтың ұзақ мерзімді мақсаттары мен міндеттерін ТМД мемлекет басшылары кеңесі айқындап, әр бес жыл сайын қабылданатын әскери ынтымақтастық тұжырымдамаларында көрініс табады.

Құжат аясында қорғаныс министрліктері, қарулы күштердің бас штабтары, әскери басқару органдары мен түрлі санаттағы әскери мамандар арасындағы байланыстар мен жұмыс қатынастарын одан әрі жетілдіру көзделген.

Ерекше назар ұлттық қарулы күштердің құрамында ортақ әскери жүйелерді нығайтуға аударылады. Ең алдымен, біріктірілген әуе шабуылына қарсы қорғаныс жүйесін, бірлескен байланыс жүйесін, радиациялық, химиялық және биологиялық жағдайды бақылау мен бағалаудың бірыңғай жүйесін, біріктірілген радиолокациялық тану жүйесін, сондай-ақ қарулы күштерге арналған бірыңғай геоақпараттық жүйені дамыту жоспарланып отыр. Бұл ұлттық армиялардың жауынгерлік қабілетін және әскери саладағы өзара іс-қимыл деңгейін едәуір арттыруға мүмкіндік береді.

Бұған дейін ТМД мемлекет басшылары кеңесінің отырысында Қазақстан Президенті Қасым-Жомарт Тоқаев климаттық және техногендік төтенше жағдайларды болжауға арналған Өңірлік болжамдау орталығын құруды ұсынған болатын.