Хайуан болуға шақыруды қойсаңдаршы! : Сырым Әуезхан энергетикалық сусын жарнамалағаны үшін сынға қалды

Айтыскер ақын Сырым Әуезхан энергетикалық сусынды жарнамалағаны үшін әлеуметтік желіде сынға қалды, – деп хабарлайды Aikyn.kz сайты.

Әлеуметтік желіде Сырым Әуезханның «Қасқыр» атауындағы энергетикалық сусынды жарнамалаған видеосы тарады. Ақынның бұл әрекеті көпшіліктің назарын аударып, қызу талқыға түсті.

Жарнамаға пікір білдірген Балғынбек Имаш Сырым Әуезханның бұл әрекетін құптамайтынын айтты.

«Дұрыс емес! Адам болып жүрген жақсы ғой. Маймылдан жақсырақ деп қасқыр боласың ба? Алла адам баласын ардақты етіп жаратты. Хайуан болуға шақыруды қойсаңдаршы. Аузына ел қараған ақын емессің бе?» – деп жазды ол.

Ал Дидар Қамиев жарнамаға әзілмен жауап беріп, «Қасқыр» энергетикалық сусынының атауына қатысты ойын өлеңмен жеткізді.

«Тұрса да балтыр сызып, бас қуысып, өзімді алдамаймын “Қасқыр” ішіп. Қасқыр ішпек түгілі біздің қазақ, жастарға кигізбеген қасқыр ішік!» – деп жазды ақын.

Осылайша, Сырым Әуезханның энергетикалық сусын жарнамасына түсуі айтыскерлер арасында пікірталас тудырды.