Илон Маск: Миллиард аз, енді триллионер боламын

Quartz хабарламасына сүйенген Aikyn.kz кеше фантастика болып көрінген сыйақының берілу себебін түсіндіреді.

Tesla-ның жыл сайынғы акционерлер жиналысындағы Илон Масктің мәлімдемелері, триллион долларлық пакетке қолы жеткен миллиардер бұрынғыдан да экспрессивті бола түскенін көрсетті. Aikyn.kz сайтының бірнеше күн бұрын көлік компаниясының акционерлері Масктің талабына келісіп, оған 1 трлн сыйақы пакетін беруге келісетіні туралы болжамы расталды. Біздің болжамымызды «2 триллион доллары бар әлемнің ең бай қоры әлемнің ең бай адамына 1 триллион доллар беруге қарсы шықты» атты сараптамалық материалдан оқи аласыз.

Маск көптен бері батыл уәделер айтып жүргенімен, олардың барлығы толық орындала бермейтін. Бейсенбідегі жеңісінен кейін ол сахнаға шығып, бірқатар тың мәлімдемелер жасады. Олардың алғышқысы ұшатын автомобильдерге байланысты болды.

Айдың басында Илон Маск Джо Роганның бағдарламасында ұшатын автомобиль идеясын меңзеген болатын. Бұл туралы Aikyn.kz арнайы «Президентпен арасы суыған миллиардер «ессіз технологиямен» ұшатын көлік жасайтынын мәлімдеді» атты материал да берді:

Бейсенбі күнгі (6 қараша) іс-шарада миллиардерге осы туралы сұрақ қойылды. Роганмен бірлескен сұхбатта көліктің алғашқы нобайын биыл жылдың соңына дейін көрсету туралы айтқан сөзіне қарамастан, енді Маск модельді 2026 жылдың 1 сәуірінде өткізетінін мәлімдеді. Әзіл күні саналатын бұл датаның өзі Масктің қалжыңға әуестігін еске салады және скептицизм тудырады. Оның айтуынша, ұшатын автомобиль өндірісі таныстырылымнан шамамен бір жылдан кейін басталады.

Айта кету керек, АҚШ-тың Федералдық авиация басқармасы (FAA) әлі де әуе таксилерін қазіргі әуе қозғалысы жүйесіне енгізу жолдарын анықтап жатыр.

Бұндай ұшу аппараттары жер бетінен 600-900 метр биіктікте жүзеге асырылмақшы. Және оны жүргізуші пилоттар үшін арнайы талаптар енгізіледі.

Tesla-ның толық автономды жүргізу (FSD) функциясына тоқталған Маск компания жүргізушілердің FSD режимінде отырып мәтін жазуға рұқсат ететінін айтқан. Қазір Tesla жүргізушілерден көзді жолдан алмай бақылауды талап етеді. Маск «бір-екі айдан кейін» жүргізушілер телефон қолдана алатынын мәлімдеді. Дегенмен көптеген штат және қала заңдары мұндай әрекеттерге әлі де тыйым салады.

Осы көліктік режиммен толығырақ «Tesla «Құтырған Макс» режимін неге қосты?» деген Aikyn.kz материалынан танысуға болады.

Маск Optimus гуманоид роботтарының өндірісі адамзат тарихында ең жылдам қарқынмен өсетінін мәлімдеді. Алдымен компания миллион робот, кейін 10 миллион, одан әрі жылына бір миллиардқа дейін өндіруді жоспарлайды. Оның сөзінше, бұл роботтар қылмыскерлерді бақылап, қылмыстың алдын алып, түрмелердің қажеттілігін жоюы да мүмкін.

Масктың келесі жобасы – Tesla-ның жартылай өткізгіштер зауытын салуы. Ол зауыттың бастапқы қуаты айына 100 000 пластина болады деп болжайды, ал ұзақ мерзімде бұл көрсеткіш айына 1 миллион чипқа дейін жетуі мүмкін екен.

Директорлар Кеңесінің шешіміне қарамастан жұма күні (7 қараша) таңертеңгі саудада Tesla акциялары 3,5%-ға төмендеді. Өйткені Илон Масктің 1 трлн долларлық өтемақы пакеті мақұлданғаннан кейін жасалған мәлімдемелер қаржы нарығын шабыттандыра қоймады. Жобалар техникалық, құқықтық және экономикалық тұрғыда әлі де айқындалмаған. Сондықтан сарапшылар оны реалистік болжамнан гөрі Масктің әдеттегі амбициялық риторикасы ретінде бағалап отыр.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.