IMEI тіркелмейді: Қазақстанда телефондарды тіркеуде мәселелер туындады

Қазақстанда басқа елдерден әкелінген мобильді телефондардың жаппай бұғатталуына қатысты шағымдар жиілеп кетті. Кәсіпкерлердің айтуынша, Ресейден, Қырғызстаннан және Өзбекстаннан әкелінген құрылғыларды тіркеу кезінде қиындықтар туындап жатыр. Бұғатталу тек жаңа смартфондарға ғана емес, бірнеше жыл бұрын сатылған аппараттарға да қатысты, деп хабарлайды Информбюро.

Сатушылардың айтуынша, құрылғыларды базаға енгізу әрекеті кезінде жүйе IMEI-кодтарды қабылдамайды. Жаңа талаптарға сәйкес, екінші нөмірді орнатқанда абонент верификациядан өтуі тиіс. Әйтпесе, құрылғы «сұр тізімге» түсіп, бір айдан кейін бұғатталады.

Кәсіпкерлер ресми түрде тіркеу тегін болғанымен, процесс күрделі әрі уақытты қажет ететінін айтады. Олардың сөзінше, кейбір азаматтар делдалдарға жүгініп, рәсімдеуге көмектескені үшін 30–50 мың теңге төлеп жүр.

Телефондарды тіркеумен елде «ATS Mediafon KZ» ЖШС айналысады. Компаниядағылар бұғаттаудың құрылғы өндірілген елге қатысы жоқ екенін мәлімдеді. Жүйе операторының өкілі заңды түрде әкелінгенін растайтын құжаттарды ұсыну жеткілікті екенін айтты.

Жеке тұлғалар үшін рәсім тегін, ал кәсіпкерлер әр құрылғы үшін 4325 теңге төлейді. Компания атап өткендей, кедендік рәсімдеусіз және міндетті төлемдерсіз әкелінген аппараттар тіркеуден өтпейді.

Сонымен бірге сатушылар тіркеу сайтының техникалық ақаулары бизнеске де, сатып алушыларға да қиындық туғызатынын алға тартады. Олар тіркеу функцияларын мемлекеттік органдарға беруді ұсынады.

Бұл жағдай қоғамда кең резонанс тудырды. Бұғаттауға тап болған пайдаланушылар түсініктеме алу үшін қайда жүгіну керегін әрдайым біле бермейтінін атап өтуде.

Бүгін, 14:09