Иранда үш адамға өлім жазасы орындалды

Иран билігі 4 мамыр күні «зорлық әрекеттеріне қатысу» және «Израильдің сыртқы барлау қызметімен байланыс» айыптары бойынша сотталған үш азаматқа қатысты өлім жазасын іске асырды. 

Бұл туралы елдің мемлекеттік телеарнасы сот органдарының мәлімдемесіне сілтеме жасап хабарлады, деп жазады АА.

Мәліметке сәйкес, Мехди Расули мен Мохаммад Реза Мири 2026 жылдың қаңтарында Мешхед қаласындағы наразылықтар кезінде «Моссадтың элементтері» ретінде әрекет етіп, қауіпсіздік қызметкері Хамид Реза Юсефи Нежадтың өліміне қатысы бар деп танылған. Ал Ибрахим Доулатабади наразылықтарды ұйымдастырушы ретінде айыпталып, оның басшылығымен болған оқиғаларда бірнеше қауіпсіздік қызметкері қаза тапқан.

Өлім жазасы таңертең орындалғаны хабарланды.

Наразылықтар тарихы 

2025 жылдың 28 желтоқсанында Тегерандағы үлкен базар саудагерлерінің бастамасымен ұлттық валютаның күрт құнсыздануына байланысты басталған наразылықтар елдің басқа өңірлеріне де тараған. 8 қаңтарда жағдай шиеленісіп, интернетке қолжетімділік шектелді.

Иран билігі жалпы қаза тапқандар мен жараланғандар саны туралы ресми дерек жариялаған жоқ. Ал құқық қорғаушылардың HRANA агенттігі 5 858 адамның қаза тапқанын, 41 283 адамның ұсталғанын хабарлаған. Иранның ресми деректері бойынша 3 117 адам қаза тапқан, олардың ішінде қауіпсіздік қызметкерлері мен бейбіт тұрғындар бар.

Бүгін, 15:53