Иттің буынына операция жасалды

Елде алғаш рет қарағандылық ветеринарлар иттің жамбас-сан буынын эндопротездеу операциясын жасады. Джеси атты неміс овчаркасына жасалған алғашқы операция сәтті өтті. 

Жалпы бұл саққұлақтардың иелері үшін үлкен қуаныш. Себебі осы уақытқа дейін мұндай диагнозы бар жануарларға ешқандай ем көрсетілмейтін. 

Алты жастағы Джесидің күшік кезінен жамбас-сан буыны ауырған. Уақыт өте келе бұл дерт артрозға айналып, соңында тіпті ақсап қалған. Әрбір қозғалысты ауырсынып, сұлық жатуды шығарыпты. Дәрі-дәрмекпен емдеу уақыт өте келе шипасын жоғалтып, асқазан-ішек жолдарының жұмысына кері әсер ете бастаған. Джесиді бұл азаптан құтқарып, қалыпты қозғалу мүмкіндігін қайтарудың жалғыз жолы – жамбас-сан буынының толық эндопротездеуі еді.

Александр Михотин, иттің иесі:

- Ол буын ауруын ауырсынып жиі қыңсылайтын. Бірге серуендеуден қалдық. Дәрілер де көмектеспей қойды. Эндопротездеу операциясын жасап бергеніне алғысым шексіз. Қазір Джси өзін жақсы сезінеді.

Джесиге арналған протез оның анатомиялық ерекшеліктерін ескере отырып, жеке дайындалған. Дұрыс күтім жасалған жағдайда титанды жамбас-сан буыны итке ұзақ уақытқа жарамды. Мамандардың айтуынша, мұндай патологиялар ірі тұқымды иттерде жиі кездеседі. Қазақстанда осындай операцияны Мәскеуде арнайы тағылымдамадан өткен ветеринар-дәрігер, хирург-ортопед Евгений Крюков жасады.

Евгений Крюков, ветеринариялық клиниканың хирург-ортопеді:

- Үш жыл бұрын мен осы эндопротездеу ізденіп, білімімді жетілдіруге кірістім. Түрлі жерлерге барып, бақылап, зерттеп, осыны елімізде жүзеге асыру үшін дайындалдым. Бұл операция өзімізде жасалсаоған кететін шығын да азаяды. Себебі басқа елге барудың қажеті жоқ. Логистикаға байланысты шығындар да болмайды.

Джеси екі аптадан бері клиникада жатыр. Протез буынмен жүруге икемделіп келеді. Ары қарай оңалтуды үй жағдайында жалғастыруға болады. Қарағандыда итіне осындай операция жасату үшін кезекке тұрғандар өте көп. 

Авторлары: Руслан Нұрланұлы, Аман Хамит