Талдықорғанда жоғары технологиялы операция жасалды

Талдықорғандық кардиохирургтер жүрекке күрделі операцияны жергілікті ауруханада жасай бастады. Шетелдік әріптестерімен тәжірбие алмасып, операцияның тың тәсілін меңгерді. 

Ол үшін медициналық мекемеде қажетті жағдай жасалды. Жалпы 2025 жылы Жетісу облысында «Ауылдық денсаулық сақтауды жаңғырту» бағдарламасымен 59  медициналық нысан салынды. Одан бөлек, жергілікті бюджет есебінен және басқа да қаржы көздерінен 30-дан аса емдеу мекемесі бой көтеріп, 4 нысан күрделі жөндеуден өтті.

Талдықорғандық кардиологтар алғаш рет кеудені ашпай, жүректің митралды қақпақшасына операция жасады. Түрік және қытай дәрігерлердің қатысуымен өткен ота науқастардың тез сауығып кетуіне мүмкіндік береді. 

Нұрсан Сұрашев, Облыстық Кардиологиялық орталықтың директоры:

- Бұл технология жалпы әлемде екі үш ақ жыл болды Европада жасалып жатқанына. Енді бірінші рет Қазақстанда жасалып жатыр үлкен ғылыми орталықтарда. Олардан қалмай біз де бәсекелесіп отырып, Талдықорғанда сондай отаны жасап жатырмыз. 

Ал облыстық көпсалалы клиника қызметкерлері гипертермиялық хайпэк операциясын енгізді. Жаңа тәсіл қатерлі ісік жасушаларын жоюға арналған. 

Бауыржан Бертаев, облыстық Көпсалалы клиника директорының орынбасары:

- ҚР 2023-27 жылдарға аралығындағы онкологиялық сырқаттарға қарсы кешенді жоспарымыздың аясында біздің клиникамызда көптеген өзгерістер болды. Заманауи онкологиялық өзгерістің барлық түрлері лабараторлы, инструменталды тексерулер. Сонымен қатар жалпы емдеу түрлері. Химия терапия, таргенттік терапия және хирургиялық емнің барлық түрі толыққанды жүргізіледі.                                                                      

Екі операция да озық үлгідегі технологияның көмегімен жасалды. Енді мұндай құрылғылар жылына 3500 нан аса сәби дүниеге келетін Жаркент қаласындағы перзентханаға да беріледі. 

Айдын Елікбаев, Панфилов аудандық ауруханасының бас дәрігері:

- Перзентханада күрделі жөндеуден өтіп жатыр. Оның жанына қосымша ғимарат салынады. Құрылысты 14 айда аяқтау межеленген. Сол кезде мекеме ангиограф, МРТ және КТ сияқты заманауи қондырғылармен жабдықталады. Жаңа бөлімдер ашылып жас мамандар тартылады.

Үш жылда Панфилов ауданында жаңадан 19 медицина мекемесі салынды. Соның бірі – Алмалы ауылында тұрғызылды. Дәрігерлік амбулаторияның ашылуымен үш мыңнан аса адам сапалы ем алатын болды. 

Тұрлыхан Ахметжанова, Алмалы ауылының тұрғыны:

- Осы ауылда тұрғаныма 40 жыл болды. Жиі-жиі осы жерге қараламыз жақсы. Бұрын тарлау болған қазір жарық кең. 

Құралай Жанатқызы, Алмалы дәрігерлік амбулаториясының дәрігері:

- Бұрынғы амбулаториядан қазіргі амбулатория екі есе үлкен. Әрі қолайлы, іші кең. Жылы, екі дәрігерге екі бөлме, медбикенің кабинеті бар. 

Облыс құрылған үш жылдың ішінде өңірде 162 емдеу мекемесі жаңартылды. Нәтижесінде медициналық қызмет сапасы жақсарып, бейімделген нысандар саны екі есе азайды. 

Авторлары: Шыңғыс Қалиден, Қуаныш Түргенбаев, Жеңіс Әбдірешов