Астанада жүрекке ерекше операция жасалды

Астанада балалардағы сирек кездесетін жүрек ақауларын емдеудің инновациялық әдістері енгізіліп жатыр, деп хабарлайды 24KZ. Күні кеше елордаға Мельбурн университетінің профессоры Игорь Константинов келіп, балалар кардиохирургиясы бойынша бірегей шеберлік сабағын өткізді. Әлемге танымал медицина маманы қазақстандық әріптестеріне тәжірибесін бөлісті. Қиын да күрделі кесел Эбштейн аномалиясын емдеудің жолдарын көрсетті.

Үмітін үзбей баласын басқалаға алып келген бұл Динара Сауытбекова. Қызына туабітті Эбштейн аномалиясы диагнозы қойылыпты. 200 адамның тек бірінде кездесетін кеселмен арпалысып жүргеніне біраз уақыт болған. Жылда емханада арнайы процедура қабылдап, емін алып жүрген. Десе де толықтай айығып кетуге мүмкіндік болмаған. Бүгін шетелдік маманның қатысуымен баласына 6 сағат ота жасалды.

Динара Сауытбекова, Түркістан облысының тұрғыны:

- Ота жасалды. Өте сәтті өтті. Ана жүрегіммен рақметімді айтамын бәріне. Осы жердегі медицина қызметкерлеріне рақметімді айтамын. Бізге, қызыма тағы да өмір сыйлады.

Мұндай күрделі һәм қиын ауруларға жасалатын ота қазір Солтүстік Америка мен Австралиядағы арнайы орталықтарда жасалады. Маңыздысы, сол жүрек қақпақшасын пластикалық тәсілмен емдейді. Егер оның орнына жасанды құрылғы қойылса, бала өскен сайын операцияға тәуелділік туындайды екен. Дәл осындай тәжірбиесімен Австралиядан арнайы келген маман бөлісіп отыр. Қазақстанға келуінің де өзіндік себебі бар.

Игорь Константинов, кардиохирург, Мельбурн университетінің профессоры:

- Мен Қазақстанның тумасымын. 9 жасымда ата-анаммен бірге Прибалтикаға қоныс аудардық. Кейін Еуропа мен Канадада оқып, жұмыс істедым. Сондықтан мен осы жақтағы хирургиядағы әріптестерімді білгеніммен үйрету, тәжірбиемді бөлісу борышым деп білемін. Бүгінгі ота біз үшін аса күрделі өтті. Бұл жерде қолданылатын әдіс жүрек қақпақшасын протездемейміз. Тек өз тіні арқылы ақауды қалыпқа келтіру жолдары жасалады. Нәтижесінде олар қалыпты жұмыс істей бастайды.

Шеберлік сағаты барысында жүрекке ашық түрде 47 ота жасалды. Оның 36-сы австралиялық профессордың қатысуымен. Қатарында Эбштейн аномалиясы бар 16 балаға операцияға қатысты.

Амангелді Керімқұлов, балалар кардиохирургия орталығының директоры:

- Шеберлік сабағы барысында жаңа туған нәрестелер мен кішкентай балалардың жүрек ақауларын хирургиялық жолмен емдеудің заманауи тәсілдері мен озық әдістері таныстырылды. Мұндай кездесу балалар кардиохирургтеріне, кардиологтарға, анестезиолог-реаниматологтарға және осы медициналық ұйымдағы жоғары технологиялы кардиохирургиялық көмекті қамтамасыз ететін басқа да мамандарға арналған. Бұл біздегі медицина әлеуетін арттыруға үлкен септігін тигізері сөзсіз. Әсіресе балалар кардиохирургиясына үлкен серпін береді.

Шетелден арнайы шақырылған маманның шеберлік сабағына арысы Америка, Сауд Арабиясы, Индонезияның жетекші мамандары да қатысты. Мамандардың сөзінше, болашақта мұндай күрделі операция елімізде тұрақты түрде жасалса, жерлестеріміз де шетелде шипа іздемейді.

Авторлары: Кәмшат Мұхамеджан, Жарқын Өрден