Израиль армиясы Ливан Сирия шекарасында химиялық заттар шашуда БАҚ

Израильдің i24NEWS телеарнасы азаматтық және әскери дереккөздерге сүйене отырып хабарлағандай, Израиль армиясының солтүстік округі бірнеше апта бойы Ливан мен Сирия шекарасына жақын аймақтарда авиация арқылы химиялық заттар шашқан. Бұл әрекет арамшөптермен күрес мақсатында жүргізілгені айтылды, деп хабарлайды АА.

Соңғы апталарда Израиль ұшақтары Сирия аумағындағы Кунейтра өңірінде де осындай операциялар жасаған.

Ливандағы БҰҰ-ның уақытша күштері (ВСООНЛ) Израиль армиясы шекарадан шегінуді талап еткенін, себебі химиялық заттарды шашу жұмыстары жүргізілетінін мәлімдеді.

i24NEWS дерегінше, шашылған зат улы емес, ол арамшөптерді жою және «террористердің» Израиль аумағына жақындауын болдырмау үшін қолданылады. Израиль армиясы бұл ақпаратты түсіндіруден бас тартты.

Ливанның қоршаған орта министрі Тамара аз-Зейн Израиль ұшақтарының Айта аш-Шааб елді мекені мен оған жақын аудандарда пестицид болуы мүмкін заттарды шашқаны туралы хабар алған соң, Ливан қарулы күштерінің қолбасшысы Рудольф Хейкальмен байланысқанын айтты. Министрдің сөзінше, топырақ үлгілерін зертханалық талдау үшін алу туралы өтініш жасалды.

ВСООНЛ бұған дейінгі мәлімдемесінде Израиль армиясы Голубая линия маңында химиялық заттар шашу операциясын жоспарлап отырғанын хабарлағанын, бұл әрекеттердің азаматтардың денсаулығына қауіп төндіретінін және ауыл шаруашылығына зиян келтіруі мүмкін екенін атап өткен.

Сирияның мемлекеттік «Аль-Ихбария» телеарнасы 30 қаңтарда Израильдің ауыл шаруашылық авиациясына тиесілі ұшақтар Кунейтраның орталық және солтүстік ауылдық жерлерінде «күдікті сұйықтықтар» шашқанын хабарлады. Бұған қоса, Сирияның SANA агенттігі 25 қаңтарда да Кунейтра ауылдық аймақтарында Израиль ұшақтарының белгісіз заттар шашқанын жазды.

Бүгін, 18:27