Израиль Иранның барлау министрі өлтірілгенін жариялады

Израильдің қорғаныс министрі Исраэль Кац сәрсенбі күні Тегеранда түнде жасалған әуе шабуылы кезінде Иранның барлау министрі Эсмаил Хатибтің қаза тапқанын мәлімдеді.

Оның айтуынша, Израильдің Иран аумағына шабуылдарының қарқыны күшейе түсті және жақын арада қақтығысты ушықтыруы мүмкін жаңа әрекеттер күтіліп отыр.

- Бұл күні барлық бағыттар бойынша елеулі «тосынсыйлар» күтіліп отыр, бұл біздің Ливандағы Иран мен «Хезболлаға» қарсы жүргізіп жатқан соғысымызға серпін береді, - деп мәлімдеді Кац қауіпсіздік мәселелері жөніндегі кеңес барысында.

Ол сондай-ақ Израиль премьер-министрі Биньямин Нетаньяхумен бірлесіп, Израиль қорғаныс күштеріне кез келген жоғары лауазымды ирандық шенеунікті қосымша мақұлдауды қажет етпей өлтіруге рұқсат беру туралы шешім қабылданғанын атап өтті.

Иран билігі әзірге Эсмаил Хатибтің өлімі туралы хабарламаларды растаған жоқ.

Израиль қорғаныс армиясы (ЦАХАЛ) 2021 жылдан бері барлау министрі қызметін атқарып келе жатқан Хатибтің Иран астанасында Израиль әскери-әуе күштері шабуылының нысанасы болғанын растады. Израиль әскерилерінің мәліметінше, Иранның барлау министрлігі барлау, бақылау, тыңшылық және шетелдегі операцияларға жауапты негізгі мекеме.

- Барлау министрлігі режимнің репрессия саясаты мен террористік әрекеттерін қолдауда орталық рөл атқарады, - делінген армия мәлімдемесінде.

ЦАХАЛ мәліметінше, Хатиб Ирандағы наразылық акцияларын, соның ішінде Махса Аминидің өлімінен кейін 2022-2023 жылдардағы наразылық акцияларын басуға белсенді қатысты, сондай-ақ Израиль мен Америка нысандарына қарсы операцияларды үйлестірді.

Иран БАҚ-ның хабарлауынша, сәрсенбіде Израильдің алдыңғы күні жасаған шабуылдарынан қаза тапқан жоғары лауазымды шенеуніктерді, соның ішінде Жоғарғы Ұлттық қауіпсіздік кеңесінің хатшысы Әли Лариджани мен «Басидж» құрылымының басшысы Голамреза Сүлейманиді жерлеу рәсімі өтіп жатыр.

Осыған дейін Израиль Иранға әуеден шабуылдар кезінде Әли Лариджанидің қаза тапқанын жариялаған болатын.