Каратэден әлем чемпионаты: қоржында үш медаль

Дзюдошылар бір қоламен оралды. Біріккен Араб Әмірліктерінің Абу Даби қаласында жапон жекпе-жегінен гранд-слэм өтті. Әлемдік аламанға 13 спортшымыз аттаған. Араларынан ең жеңіл салмақтағы Әбиба Әбужақынова ғана үздік үштікті түйіндеп, қола жүлдегер атанды. Қалған қыз-жігіттер іріктеуден ары аса алмады.

Әлем чемпионатында жүлдеге ілікті

Қоржынымызда үш медаль. Мысыр астанасы Каир қаласында каратаэден жылдың басты жарысы әлем чемпионаты аяқталды. Биылғы дүниежүзілік дода ерекше форматта өтті. Яғни бұл жолы қатысушылар әлемдік рейтинг бойынша іріктелді және ең үзіктері ғана шақырту алды. Нәтижесінде байрақты бәсекеде сегіз спортшымыз бақ сынады. Әсіресе аса ауыр салмақтағы Софья Берульцева финалға дейін жетіп, шешуші жекпе-жекте германиялық Йоханна Колено Книрменге жол берді. Осылайша ол күміс жүлдегер атанды. Бұған қоса әйелдер арасында 61 келідегі Әсел Қанай мен ерлер арасында 67 келідегі Дидар Әмірәлі өз салмақтарында үздік үштікті түйіндеп, қола жүлдеге қол созды. Жалпы биылғы жыл отандық каратэшілер үшін сәтті өтті деуге болады. Дархан Асаділов баптайтын қыз-жігіттер мамыр айында Ташкенттегі Азия чемпионатында 4 алтын, 1 күміс және 5 қола жеңіп алып, жалпы командалық есепте бірінші орынға жайғасты. Одан кейін Қытайдағы Дүниежүзілік жауынгерлік ойындары және Сауд Арабиясындағы Ислам ынтымақтастығы ойындардында да өте жоғары нәтижелер тіркеді.

Балалар арасындағы халықаралық турнир 

Жеті елдің өрендері елордаға жиналады. Бұнда футболдан балалар арасындағы халықаралық турнир өтеді. «Астана Кубогы» деп аталатын байрақты бәсеке осымен төртінші рет ұйымдастырылып тұр және жыл өткен сайын қатысушылар саны мен географиялық ауқымы кеңейіп келеді. Мысалы, биыл бұл жарысқа мәскеулік «Спартак», ташкенттік «Пахтакор», бакулік «Карабах» және тбилисилік «Динамо» сияқты клубтардың академиялары қатысуға қызығушылық танытқан. Қырғызстан және Тәжікстан командалары да келетінін растады. Бұған қоса еліміздің түкпір-түкпірінен келетін жас футболшылар бар. Бас-аяғы 16 команда бас жүлдені сарапқа салады. «Жарыстың өзі 6-9 желтоқсан аралығында өтеді және осы арқылы жас футболшылардың шеберлігін шыңдап, тәжірибелерін толыстырып, болашақ чемпиондарды бала жастан тәрбиелеуге ден қоямыз», – дейді мамандар.

А. Қожаназаров: Дайындық үзілмеу керек

Көшпенділер ойындарына дайындық қазірден басталуы керек. Бұл жөнінде Қазақстан көкпар федерациясының президенті Айдарбек Қожаназаров мәлімдеді. Оның айтуынша, жаттығу жұмыстарының үзілмегені маңызды. Бұған қоса көрші елдермен жиі жолдастық кездесулер өткізіп, жігіттерді бабында ұстауға жіті көңіл бөлінеді. Осы мақсатта жуырда ғана Шымкентте көкпардан алғашқы клубаралық Қазақстан Кубогы өтті. Артынша ұлттық құраманың жігіттері сол жерде жаттығу жиынына қалып, жалпы физикалық дайындықты пысықтап жатыр. «Ал алдағы жылы жаттығудың да, жарыстың да саны артады және ең басты мақсат, жоғарыда айтқандай, көрші қырғыз елінде өтетін Дүниежүзідік көшпенділер ойындарында лайықты өнер көрсетіп, жақсы нәтиже тіркеу», – дейді Айдарбек Қожаназаров.