Кеншілер күні: Қарағандылық ұландықтар қауіпсіздік күзетінде

Қарағанды қаласында дәстүрлі түрде кең көлемде аталып өтетін Кеншілер күніне арналған мерекелік іс-шаралар жоғары деңгейде ұйымдастырылды. Қала тұрғындары мен қонақтары үшін мерекелік концерт өтіп, оған 250 мыңға жуық адам жиналды.

Көпшілік қатысқан ауқымды шара барысында қоғамдық қауіпсіздік пен құқықтық тәртіпті қамтамасыз етуге Қазақстан Республикасы Ұлттық ұланының “Орталық” өңірлік қолбасшылығына қарасты әскери бөлімдерден 800-ден астам әскери қызметшісі жұмылдырылды.

Ұландықтар мерекелік концерт өтетін аумақта қоғамдық тәртіпті сақтау, азаматтардың қауіпсіздігін қамтамасыз ету және төтенше жағдайлардың алдын алу бағытында қызмет атқарды. Әскери қызметшілер адамдар көп шоғырланған орындарда қоғамдық тәртіпті бақылап, азаматтарға қажетті жағдайда көмек көрсетті.

Іс-шара барысында әскери қызметшілер күшейтілген режимде қызмет атқарып, тұрғындардың мерекелік кешті қауіпсіз әрі алаңсыз өткізуіне өз үлестерін қосты.

Кеншілер күні – Қарағанды өңірі үшін айрықша маңызы бар мереке. Еңбек адамын ұлықтайтын бұл күн жыл сайын мыңдаған қарағандылықты бір ортаға жинап, өңірдің басты құндылықтарының бірі – кеншілер еңбегіне деген құрметті арттыра түседі.

Қоғамдық тәртіп пен азаматтардың қауіпсіздігін қамтамасыз ету – Ұлттық ұлан әскери қызметшілерінің басты міндеттерінің бірі. Қарағандылық ұландықтар кез келген бұқаралық іс-шара кезінде өздеріне жүктелген міндетті жоғары жауапкершілікпен атқарып, ел тыныштығы мен тұрғындардың қауіпсіздігін қамтамасыз ету жолында қызмет етуде.