Киевке Еуропа елдерінің ұлттық қауіпсіздік жөніндегі кеңесшілері келді

АЛМАТЫ, 3 қаңтар - Sputnik. Еуропа елдерінің ұлттық қауіпсіздік мәселелері жөніндегі кеңесшілері Киевке келді, деп хабарлады Украинаның Ұлттық қауіпсіздік және қорғаныс кеңесінің хатшысы Рүстем Умеров. Бұл туралы РИА новости жазды.

3 қаңтарда Украинада "тілек білдірушілер коалициясы" деп аталатын елдердің ұлттық қауіпсіздік мәселелері жөніндегі кеңесшілерінің кездесуі, ал 6 қаңтарда Францияда коалиция жетекшілерінің кездесуі өтеді. Бұл туралы 30 желтоқсанда Владимир Зеленский хабарлаған болатын.

"Киевке Еуропа елдерінің ұлттық қауіпсіздік мәселелері жөніндегі кеңесшілері келді. Кездесулерге Германия, Ұлыбритания, Франция, Италия, Испания, Латвия, Эстония, Литва, Польша, Финляндия, Канада, Нидерланды, Швеция, Норвегия және Дания өкілдері қатысады. Сондай-ақ НАТО, Еуропалық кеңес және Еуропалық комиссия өкілдері де бар", - деп жазды Умеров өзінің Telegram-арнасында.

Оның айтуынша, бұл ауқымды шарада қауіпсіздік және экономика мәселелері, негіздемелік құжаттармен жұмыс істеу, әрі қарайғы қадамдарды үйлестіру туралы талқыланады.