Көктемгі егіс жұмыстарын ерте қаржыландыруға 1 580 нен астам ауыл еңбеккері қол жеткізді

Биылғы маусымдық көктемгі дала жұмыстарын ерте қаржыландыру бағдарламасын іске асыру қарқынды жалғасуда. Бағдарламаға өтінім қабылдау өткен жылдың қазан айында басталған болатын, – деп хабарлайды Aikyn.kz. 

Бүгінде 273 млрд теңге көлемінде 2 004 ауыл шаруашылығы тауар өндірушілерін қамтитын пул қалыптасты. Қазірдің өзінде 1 581 өтінім назарға алынып, 172,3 млрд теңгеге қаржыландырылды, 2 млн гектардан астам егіс алқабы қамтылды.

Сонымен қатар несие сомасының 85%-на дейін кепілдік беруге жол ашатын «Даму» қоры арқылы қарыздарды кепілдендіру тетігі іске асырылуда, Қазіргі уақытта 333 кепілдік берілді, қарыз сомасы 55 млрд теңгені құрайды.

Мемлекет басшысының көктемгі дала жұмыстарын уақытылы әрі сапалы жүргізуді қамтамасыз ету жөніндегі тапсырмасын орындау аясында «Кең дала 2» бағдарламасы бойынша өтінімдерді қабылдау 1 қазанда басталған.

Қаржыландыруды ерте бастау шаруаларға 2026 жылғы егіс науқанына алдын ала дайындалуға мүмкіндік береді. Алынған қаражат жанар-жағармай материалдарын тиімді бағамен сатып алуға, минералдық тыңайтқыштар алуға, ауыл шаруашылығы техникасын жөндеуге және қажетті тұқым қорын қалыптастыруға бағытталады.

Жеңілдетілген қаржыландыру көктемгі дала жұмыстарын дайындау мен өткізуге, сондай-ақ егін жинау науқанына және маусымдық шығындарды жабуға қолжетімді. Қаражат еліміз бойынша Аграрлық несие корпорациясының филиалдық желісі және серіктес қаржы институттары арқылы ұсынылады.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.