Көктоғайдағы оқиғаға байланысты күмәнді сұрақтар қалып отыр

Еламан Сағиевтің туыстары болған жағдайдың түсініксіз екенін айтып, ашық тергеу жүргізуді талап етуде.

Еске сала кетсек, 19 желтоқсанда Индер ауданына қарасты Көктоғай ауылында жұмыс барысында электрик 10 киловольттық электр доғасынан жарақат алған. Алдымен ол Индер аудандық ауруханасына жеткізілген, кейін жағдайы нашарлап Атырауға ауыстырылып, травматология және реанимация бөліміне жатқызылды.

Зардап шегушінің туыстары жұмыстың қалай жүргізілгеніне және қауіпсіздік талаптарының сақталуына қатысты сұрақтар қойып отыр. Олардың айтуынша, қорғаныс киімі жеткілікті деңгейде қорғамаған, ал алынған күйіктердің сипаты жұмыстардың қауіпсіз жағдайда жүргізілгеніне күмән тудырады.

«Атырау Жарық» компаниясы оқиға бойынша қызметтік тексеріс жүріп жатқанын хабарлады. Кәсіпорын зардап шеккен адамның емделу шығындарын, сондай-ақ оны сүйемелдеушілердің жолы мен тұруын толық өз мойнына алатынын мәлімдеді. Ал науқасты Астанаға санитарлық авиация арқылы ауыстыру мәселесі медициналық мекеменің құзырында екенін, бұл шешімді дәрігерлер қабылдайтынын атап өтті.

Облыстық денсаулық сақтау басқармасының дерегінше, науқастың жағдайы ауыр деп бағалануда. Зардап шегушінің денесінің шамамен 5 пайызы күйген. Екі қолы, оң балтыры және башпайлары зақымданған. Ол дәрігерлердің тұрақты бақылауында, республикалық деңгейдегі мамандармен де кеңес жүргізілуде.

Сонымен қатар туыстарының айтуынша, медициналық мекемеде кәсіпорынның техникалық журналы бар бір ер адам палатаға кірмек болғанда тоқтатылған. Жақындары оның қандай мақсатпен және кімнің тапсырмасымен науқасқа бармақ болғанын түсінбей, бұл жағдайды қосымша күмән тудыратын жайт деп санайды.

Отбасы зардап шегушіні арнайы медициналық көмек алу үшін Астанаға ауыстыруды талап етуде. Олардың сөзінше, бұл мәселе бойынша түпкілікті шешім әлі қабылданбаған.

Атырау облысының полиция департаменті хабарлағандай, Индер аудандық полиция бөлімі ҚР Қылмыстық кодексінің 156-бабының 2-бөлігі бойынша (еңбек қауіпсіздігі ережелерін бұзу фактісі) сотқа дейінгі тергеуді бастады. Бұдан бөлек, мемлекеттік еңбек инспекторлары ресми тексеріс жүргізуді қолға алды, оның аясында жұмыс берушінің әрекеттеріне және еңбек қауіпсіздігі талаптарының сақталуына құқықтық баға берілмек.

Жақындары үшін маңыздысы – тек емдеу ғана емес, оқиғаның мән-жайын әділ анықтау. Олар осыдан 13 жыл бұрын дәл осы отбасында ауыр күйікпен аяқталған ұқсас жағдай болғанын еске салып, бұл оқиғаның әділ, ашық және толыққанды тергеумен қаралуы қажет деп санайды.

Айгүл МАНСУРОВА

Бүгін, 12:10