Көлігі мен үйін сатып, кредит алған: Шымкент тұрғынын алаяқтар тақырға отырғызды

АЛМАТЫ, 21 қазан – Sputnik. Шымкентте полицейлер ірі көлемде ақша жымқырды деген күдікке ілінген адамдарды ұстады, деп хабарлайды Polisia.kz.

Қала тұрғыны өзін банк қызметкеріміз деп таныстырған белгісіз адамдарға алданып қалған. Алаяқтар әйелдің атына кредит рәсімделіп жатқанын айтып, сеніміне кіріп, өз айтқанын орындауға көндірген.

"Алаяқтар жәбірленуші мен оның жұбайының атына бірнеше банктен кредит рәсімдетіп, тіпті олардың үйі мен автокөлігін төмен бағамен сатуға көндірген. Келтірілген жалпы материалдық шығын 25 миллион теңгеден асты", - дейді ведомство.

Жәбірленушілер қаражаттың бір бөлігін алаяқтардың нұсқауымен белгісіз шоттарға аударған, ал қалған соманы үйіне келген курьерге беріп жіберген. Жедел-іздестіру шараларының нәтижесінде полиция қызметкерлері бұл қылмысқа қатысы бар адамдарды Алматы және Шымкент қалаларынан анықтады.

"Күдіктілер ұрланған қаражатты Шымкенттегі айырбастау пункті арқылы Грузияға аударған. Полицейлер екі күдіктіні ұстады. Алаяқтық жайты бойынша қылмыстық іс сотқа жолданды", - дейді полиция.

Полиция азаматтарға өзін банк қызметкеріміз деп таныстырған бейтаныс адамдардың қоңырауына сенбеуді, жеке деректер мен құпия кодтарды ешкімге айтпауды ескертті. Күмән тудырған қоңыраулар түскен жағдайда бірден полицияға жүгіну керек.