Криптовалютамен заңсыз айналысқан 130 алаңның қызметі тоқтатылды

Агенттік мәліметінше, интернет-алаяқтық және есірткі саудасынан түскен кірістерді жылыстату үшін пайдаланылған 130 заңсыз криптобиржаның қызметі тоқтатылған.

Тергеп-тексеру барысында 16,7 млн USDT сомасындағы цифрлық активтерге тыйым салынды.

- Қаржы жылыстату схемасында қылмыскерлер ақшаны банк шоттарына немесе криптовалюта айырбастау қызметін көрсететін әмияндарға аударады. Кейін қаражат конвертацияланып, қаржылық операциялар тізбегі арқылы оның шыққан көзі жасырылады. Заңсыз табысты «тазарту» үшін арнайы ақы алынады.

Мұндай операциялар кезінде көбіне дропперлердің банк карталары мен әмияндары пайдаланылады. Осылайша, заңсыз криптоайырбастау алаңдары көлеңкелі қаржы айналымына қатысып, қаражатты қолма-қол ақшаға айналдыру және шетелге шығару арқылы «кәсіби жылыстатушылар» ретінде әрекет етеді, - деп түсіндірді ведомстводан.

Қаржылық мониторинг агенттігі азаматтарға цифрлық активтерді айырбастау кезінде заң аясында жұмыс істейтін, ресми тіркелген және лицензияланған провайдерлерді ғана пайдалануды ұсынады.

Лицензиясы бар криптобиржалардың тізімімен АХҚО-ның ресми сайтында танысуға болады.

Ведомство заңсыз схемаларға қатысу қылмыстық жауапкершілікке әкелетінін ескертеді.

Айта кетейік, Ұлттық банк крипторезерв тұжырымдамасын әзірлеп жатыр.