Күрделі қылмысты ашатын Атыраулық Шерлок ​ кім?

Атырау облысында күрделі қылмыстық істерді тергеумен айналысатын тергеуші Темірхан Хажмұратовтың еңбегі туралы баяндалды.

Атап өтілгендей, Атырау облысы Полиция департаментінің тәжірибелі тергеушісі үшін қылмыстарды тергеу өмірлік ісіне айналған.

Қызмет еткен жылдар ішінде Темірхан Хажмұратов өзін принципшіл, ұқыпты және білікті маман ретінде көрсете білді.

Полицияның мәліметінше, сараптамалық ойлау қабілеті, қылмысты ашуға мүмкіндік беретін кез-келген детальға назар аудара білуі және күрделі істерде ілікті табу шеберлігі үшін әріптестері мен журналистер оны бейресми түрде «Атыраулық Шерлок» деп атайды.

Көпжылдық қызмет жолында ол қоғамда үлкен резонанс тудырған бірқатар ауыр қылмыстық істерді тергеп, олардың жан-жақты әрі объективті зерттелуіне елеулі үлес қосты. Солардың қатарында қоғам назарын аударған Яна Легкодимоваға қатысты қылмыстық іс те бар. 

Темірхан Қажымұратов жүргізген істердің ішінде Жылыой ауданында 7 жастағы қыз балаға қатысты жасалған аса ауыр қылмыс ерекше болды. Тергеу барысында жиналған дәлелдемелер мен жүргізілген процессуалдық іс-шаралардың нәтижесінде сот кінәлі деп танылған тұлғаға өмір бойына бас бостандығынан айыру жазасын тағайындады.

Сондай-ақ Индер ауданында екі сәбидің қаза болуына байланысты қозғалған қылмыстық іс бойынша да тергеу жұмыстарына қатысып, оқиғаның барлық мән-жайын анықтауға атсалысты. Іс бойынша жиналған дәлелдер сотта жан-жақты қаралып, нәтижесінде айыпталушыға өмір бойына бас бостандығынан айыру жазасы кесілді. 

Оның өндірісінде болған тағы бір резонансты іс – Қызылқоға ауданының Жангелдин ауылында бір отбасының төрт мүшесінің қаза болуына қатысты қылмыстық іс. Тергеу толық аяқталып, іс сот қарауына жолданды. Қазіргі уақытта сот талқылауы жалғасып жатыр.

Оның пайымынша, тергеушінің басты міндеті – істі қысқа мерзімде аяқтау емес, барлық дәлелдемелерді мұқият жинап, оқиғаның ақиқатын анықтау және әділ сот төрелігін жүзеге асыруға берік негіз қалыптастыру. 

Әріптестері Темірхан Қажымұратовты жоғары жауапкершілігімен, сабырлы мінезімен және өз ісіне адалдығымен ерекшеленетін маман ретінде сипаттайды.

Көзге көп көріне бермейтін, бірақ үлкен жауапкершілік пен кәсіби шеберлікті талап ететін тергеуші еңбегі қоғам қауіпсіздігін қамтамасыз етуде айрықша маңызға ие. Ал Темірхан Қажымұратовтың кәсіби жолы – заң үстемдігі мен әділдік қағидаттарына адал қызмет етудің жарқын үлгісі.

2025 жылдың желтоқсанында ауыр қылмысты ашуға қосқан елеулі үлесі үшін оған мерзімінен бұрын полиция майоры шені берілді.

Бүгін, 12:13