Күзден көктемге дейін электр энергиясы тапшылығы айына 330 млн кВт/сағатқа жетуі мүмкін

— Күзгі-қысқы кезеңге дайындық аясында жүйелік оператор алдағы күзгі-қысқы кезеңге арналған электр энергиясы мен қуаттың болжамды теңгерімдерін әзірледі. Әзірленген теңгерімдерге сәйкес, 2025 жылғы қазаннан бастап 2026 жылғы наурызға дейінгі кезеңде электр энергиясы мен қуат бойынша тапшылық күтіледі. Болжам бойынша электр жүктемесінің ең жоғары мөлшері 17,6 ГВт. Ал электр стансаларындағы генерация көлемі шамамен 16,7 ГВт деңгейінде болады. Қуат тапшылығы 0,9 ГВт көлемінде болжанып отыр, — деді компания басшысы «Самұрық-Қазына» АҚ қоғамдық кеңесінің отырысында.

Оның дерегінше, ай сайынғы электр энергиясы тапшылығы 125 млн кВт/сағаттан 330 млн кВт/сағатқа дейін болуы мүмкін. Күзгі-қысқы кезең бойындағы жалпы электр энергиясы тапшылығы 1,0 млрд кВт/сағаттан асуы ықтимал.

— Электр энергиясы мен қуат тапшылығы көршілес энергия жүйелерінен, атап айтқанда Ресей Федерациясы мен Өзбекстаннан электр энергиясын жоспарлы импорттау есебінен өтелетін болады, — деді ол. 

Айта кетелік бұған дейін Алматы жылу электр орталықтары қашан газға көшірілетіні туралы жазған едік.