Ластанған ауа: синоптиктер Алматы мен Атырау тұрғындарына ескерту жасады

«Қазгидромет» синоптиктері екі қала тұрғындарын қолайсыз метеорологиялық жағдайлар (ҚМЖ) туралы ескертті, деп хабарлайды Arasha.kz.

Ұйымның сайтында көрсетілгендей, бүгін, 2025 жылғы 20 желтоқсанда, ауаның ластануына әкелетін қолайсыз метеорологиялық жағдайлар Алматы қаласында, сондай-ақ түнгі уақытта Атырауда күтіледі.

Қолайсыз метеорологиялық жағдайлар (ҚМЖ) — бұл қысқа мерзімді метеорологиялық факторлардың (тымық ауа, әлсіз жел, тұман, инверсия) жиынтығы, олар атмосфераның жерге жақын қабатында зиянды (ластаушы) заттардың жиналуына ықпал етеді.

ҚМЖ кезінде қала тұрғындарына ашық ауада болу уақытын, әсіресе автожолдар мен өзге де ластау көздерінің маңында, қысқарту ұсынылады. Ал өкпе, жүрек-қан тамырлары немесе аллергиялық аурулардан зардап шегетін адамдар ашық ауада жүргенде өздерімен бірге қажетті дәрі-дәрмектерін алып жүруі тиіс.

Бұған дейін Алматыда 20–26 желтоқсан аралығында ауа райы құбылмалы әрі тұрақсыз болатыны хабарланған.