Лицензиясыз жұмыс істеген: Жетісуда аурухана басшыларына миллиондаған айыппұл салынды

АСТАНА, 22 қараша - Sputnik. Жетісу облысының денсаулық сақтау мекемелерінде тиісті сертификаттарсыз және лицензиясыз қызметтер көрсетілген, деп хабарлады Бас прокуратура.

Қаратал ауданының прокуратурасы денсаулық сақтау мекемелерінде тиісті маманның сертификаттары мен медициналық қызметпен айналысуға лицензиясы жоқ болғанына қарамастан халыққа медициналық қызметтер көрсетілгенін анықтады.

Аудандық прокуратураның қадағалау актілері бойынша 20 адам әкімшілік жауапқа тартылды, оның ішінде 3 басшыға - орталық аудандық аурухананың бас дәрігері және оның орынбасарларына 4 049 960 теңге мөлшерінде әкімшілік айыппұл салынды.

Сонымен қатар тексеру аясында 4 жауапты тұлға (ауылдық аурухана басшылары) медицина қызметкерлерінің халықты вакцинациялау ережелерін бұзғаны үшін 157 280 теңге көлемінде айыппұл түріндегі әкімшілік жауапқа тартылды.

"Осы тексеріс нәтижесінде 148 адамның құқығы қорғалды, оның 100-ден астамы кәмелетке толмаған балалар", - делінген хабарламада.

Қадағалау актісі бойынша бюджетке 12,8 млн теңге қайтарылды.