Лувр қауіпсіздік жүйесін күшейту үшін тендер жариялады

Лувр музейінің басшылығы қауіпсіздік шараларын күшейтуге бағытталған жұмыстарды орындау үшін тендер жариялады. Бұл туралы «РИА Новости» танысқан ресми құжатта жазылған. Жоба музейдің өз бюджеті есебінен қаржыландырылмақ.

Бюджет көлемі мен нақты жұмыстардың тізімі әзірге жарияланбады. Тендерге өтінім беру мерзімі 3 желтоқсанда аяқталады. Мердігермен жасалатын келісімшарттың жоспарланған мерзімі — 7,5 жыл.

Лувр директоры Лоранс де Кардың айтуынша, 2026 жылдың соңына дейін музейге қосымша 100 бейнебақылау камерасы орнатылады және ғимарат ішінде полиция бөлімшесі ашылады. Алдағы екі аптада музейде «рұқсатсыз кіруді алдын алу жүйелері» іске қосылмақ, бірақ олардың нақты қалай жұмыс істейтіні айтылмады.

Луврда 19 қазанда болған ірі ұрлықтан кейін қауіпсіздікке қатысты шаралар күшейтіліп жатыр. Сол күні құны 88 млн еуроға бағаланатын зергерлік бұйымдар ұрланған еді. Төрт күдіктіге айып тағылды, алайда тергеу музей қызметкерлерінің қатысы бар деген болжамды растамады.

Бүгін, 12:33