Луврдан ұрланған әшекейлер сақтандырылмаған болып шықты

Financial Times басылымы жазып өткендей, Францияның Мәдениет министрлігі ел үкіметі ұрланған жәдігерлердің орнына өтемақы алмайтынын мәлімдеген.

— Ұлттық мұражайлардағы туындылар өздерінің тұрақты сақтау орындарында тұрған кезде, мемлекет өзі сақтандырушы рөлін атқарады, — деді министрлік өкілі Le Parisien газетіне берген сұхбатында.

Оның айтуынша, мұндай сақтандырудың құны өте жоғары, ал «тәуекел деңгейі төмен». Сондықтан мұражайлар қымбат жәдігерлерді бір-біріне уақытша беру немесе оларды басқа орынға көшіру кезінде ғана сақтандыру рәсімдейді.

Сақтандыру нарығы сарапшыларының сөзінше, Лувр сияқты ірі мекеме үшін бүкіл коллекцияны толықтай сақтандыру іс жүзінде мүмкін емес. Мысалы, Леонардо да Винчидің «Мона Лизасы» немесе «Танистік Ұлы Сфинкс» секілді құндылықтарды нақты бағалау мүмкін емес.

Сарапшылар мәлім еткендей, ұқсас жағдай 2019 жылы өртенген Париждегі Нотр-Дам соборын қалпына келтіру кезінде де болған — сол кезде негізгі шығынды Франция үкіметі өз мойнына алған.

Бұған дейін Парижде Лувр мұражайында бағалы бұйымдар ұрланғаны хабарланған еді.

Франция президенті Эмманюэль Макрон Луврдағы зергерлік бұйымдардың ұрланғанына жауап беріп, олардың қайтарылып, кінәлілер жауапқа тартылатынын айтты.

Ал осыдан бұрын Дуров Луврдан ұрланған зергерлік бұйымдарды сатып алуға дайын екенін атап өтті.

Атышулы істі тергеу қалай жүріп жатқанын мына материалдан оқи аласыз.