МАЭК салықтан босатылады

Маңғыстау атом энергетикалық комбинаты салықтан босатылады. Бүгін Мәжіліс депутаттары тиісті заң жобасын қабылдады. Яғни бұл кәсіпорын мемлекет бөлген субсидия үшін қазынаға салық төлемейді.

Депутат Еділ Жаңбыршиннің сөзінше, заңға сәйкес коммуналдық мекемеге берілген субсидияның 20 пайызын кәсіпорын табыс салығы ретінде кері қайтаруы тиіс. Былтыр МАЭК-ке республикалық бюджеттен 5 млрд теңге көлемінде қаржы бөлінген. Ал тәртіп бойынша мекеме соның 1 миллиардын салық ретінде мемлекетке кері қайтарып беруі тиіс еді. Айта кету керек, бүгінде МАЭК-те инфрақұрылым мәселесі өзекті. Кей қондырғылардың тозығы жеткен. Ал мекеменің тек «ҚазТрансГазАймақ» компаниясы алдындағы қарызы 20 млрд теңгеге жетеді. 

Еділ Жаңбыршин, ҚР Парламенті Мәжілісінің депутаты:

- Мемлекет өзі көмекті мемлекеттік компанияға береді. Алайда соның 20 пайызын салық күйінде кері алып кетеді. Сондықтан берілген ақша толықтай қарыздарды жабуға немесе өзінің жабдықтарын жөндеуге толық жұмсалуы үшін біз айтып отырған салықты алып тастау керек. Себебі ол мемлекеттің мекемесі, мемлекеттің ақшасы. Сондықтан ол сол жерде толық тиімді жұмсалуы тиіс.