Импортталатын дәрі дәрмек шикізаты салықтан босатылады

Отандық дәрі-дәрмектердің құнын төмендету және саланы қолдау үшін Денсаулық сақтау министрлігі жаңа салық жеңілдіктерін бастады. Бұл туралы Үкімет отырысында министр Ақмарал Әлназарова мәлімдеді, деп хабарлайды Egemen.kz. 

«Тегін медициналық көмектің кепілдендірілген көлемі (ТМККК) және МӘМС жүйесі шеңберінде сатып алынатын дәрілік заттарды өндіру кезінде пайдаланылатын импортталатын субстанция мен шикізатты ҚҚС-тан босату жөніндегі Үкімет қаулысының жобасы әзірленді», деп атап өтті ДСМ министр Ақмарал Әлназарова.

Сонымен қатар ведомство ауруханаларда отандық тауарлардың сатып алу үлесін ұлғайтуға ниетті. Егер, мысалы, Бірыңғай дистрибьюторда ол 30%-ға жетсе, медициналық ұйымдарда дербес сатып алу тек 10%-ды құрайды. Қабылданып жатқан шаралар салада бар серпінді күшейтуге арналған.

Бүгінде елімізде 200-ден астам тауар өндіруші тіркелген. 10 айдың қорытындысы бойынша олардың өнімділігі 11,7%-ға өсіп, 156,6 млрд теңгеге жетті. Дәрі-дәрмектің 460 атауын локализациялауды көздейтін тағы 9 инвестициялық жоба қаралу сатысында тұр.