​Маңғыстауда алаяқ биометрия арқылы таныстарының атынан онлайн кредит рәсімдеген

Маңғыстау облысында 24 жастағы ер адамға қатысты сот үкімі шықты, деп хабарлайды Lada.kz. 

Ол таныстары мен туыстарының атынан онлайн-кредиттер рәсімдеп, жалпы 6,5 млн теңгеден астам шығын келтірген. Алаяқ жәбірленушілерден телефонды «фотосессияға» сұрап алып, шын мәнінде банк пен микрофинанс ұйымдарының қосымшаларында биометриялық сәйкестендіруден өткізген.

Сотта ол кінәсін толық мойындап, ақшаны қайтаруға уәде бергенімен, қылмыстың қайталануы мен ірі көлемдегі шығын ескеріліп, оған 3 жыл орташа қауіпсіздік мекемесінде бас бостандығынан айыру жазасы тағайындалды. Сонымен қатар, ол жәбірленушілерге 6,5 млн теңгеден астам материалдық шығынды өтеуге міндеттелді.

Мамандар азаматтарға смартфонды бөгде адамдарға бермеуді және бейтаныс адамдардың өтінішімен бет-әлпет арқылы сәйкестендіруден өтпеуді ескертеді, себебі бұл қаржылық операцияларға арналған цифрлық қолтаңба болып саналады.

Бүгін, 18:09