Маңғыстауда көлік прокуратурасының қызметкері алаяқтық жасады деген күдікпен ұсталды

Маңғыстауда көлік прокуратурасының қызметкері 2,5 миллион теңгемен ұсталғаны туралы ақпарат түсті. Бұл деректі Қазақстанның Бас прокуратурасы растады, деп хабарлайды Arasha.kz.

Lada.kz сайтының жазуынша, 33-шағын ауданда Маңғыстау көлік прокуратурасының қызметкері ұсталған және оның жанынан 2,5 миллион теңге табылған.

Бас прокуратура бұл фактіні растағанымен, табылған ақша туралы мәліметті түсіндірмеді.

— Құқықбұзушылықтардың алдын алу және өз қатарларындағы заңсыз әрекеттердің жолын кесу мақсатында Бас прокуратураның ішкі қауіпсіздік бөлімшесі Маңғыстау облысы бойынша ҰҚК департаментімен бірлесіп, 2025 жылғы 9 қарашада алаяқтық жасады деген күдікпен Маңғыстау көлік прокуратурасының қызметкерін ұстады, — деп хабарлады ведомство.

Қазіргі уақытта қажетті тергеу амалдары жүргізіліп жатыр. Қылмыстық-процестік кодекстің 201-бабына сәйкес, өзге ақпарат жария етуге жатпайды.

Сонымен қатар, аталған мемлекеттік қызметші 2024 жылдан бері бала күтіміне байланысты демалыста болғандықтан, өз қызметтік міндеттерін іс жүзінде атқармағаны нақтыланды.