Маркетплейстерден тапсырыс беру: кімге қосымша ақы төлеуге тура келетінін МКК түсіндірді

Мемлекеттік кірістер комитеті шетелдік маркетплейстерде тапсырыс берілген тауарларға қатысты қандай ережелер қолданылатынын түсіндірді, деп хабарлайды Tengrinews.kz.

Жаңа тәртіп 2026 жылғы 1 шілдеден бастап күшіне енуі тиіс еді, алайда оны енгізу мерзімі шегерілді. Бұған Еуразиялық экономикалық одаққа мүше елдердің бірі ЕАЭО Кеден кодексіне енгізілген өзгерістерді ратификациялау үшін қажетті мемлекетішілік процедураларды аяқтамағаны себеп болған.

Жаңа нормалар одаққа мүше барлық мемлекетте бір уақытта күшіне енуі тиіс болғандықтан, оларды іске қосу кейінге қалдырылды. МКК жаңа мерзімді әзірге жариялаған жоқ.

Оған дейін шетелдік сәлемдемелерді рәсімдеу мен алудың бұрынғы тәртібі сақталады.

Бұл ретте жаңа ережелер айқындалып қойған. Олар қазақстандықтардың Temu, AliExpress, iHerb және өзге де шетелдік алаңдардан тапсырыс беретін тауарларына қатысты болады.

Мұндай сатып алулар "электрондық сауда тауарлары" деген жеке санатқа бөлінеді. Олар үшін арнайы декларация енгізіледі, онда әртүрлі жеке тұлғаның 999 тауары туралы мәліметті көрсетуге болады.

Сатып алушылар кеден органдарына өз бетінше жүгінбейді. Олар үшін декларацияны электрондық сауда операторлары тапсырады.

Егер сатып алынған тауар құны 200 еуродан аспаса, баж салығы мен салық төлеу талап етілмейді. Сәлемдеме әдеттегі тәртіппен жеткізіледі, ал бажсыз лимит бұрынғы деңгейде қалады.

Бұл ретте қолданыстағы 31 келілік салмақ шектеуі жойылады.

Егер тауар құны 200 еуродан асса, сатып алу сомасының 5 пайызы мөлшерінде кедендік баж салығы, сондай-ақ 16 пайыз мөлшерінде ҚҚС алынады.

Маңызды: баж салығы тек асып кеткен сомадан емес, тауардың жалпы құнынан есептеледі. Мысалы, құны 250 еуро тапсырыс үшін ол ҚҚС-ты есептемегенде 12,5 еуро, ал 500 еуролық зат үшін 25 еуро болады.

Қазір басқа тәртіп қолданылады: бажсыз лимиттен асқан жағдайда, асып кеткен соманың 15 пайызы мөлшерінде бірыңғай төлем алынады.

Жаңа ережелер ЕАЭО аумағында тұрған және Wildberries, Ozon, Kaspi.kz сияқты жергілікті интернет-алаңдар арқылы сатылатын тауарларға әсер етпейді.

Мемлекеттік кірістер комитеті ережелер нақты қашан күшіне енетінін қосымша хабарлауға уәде берді.

Google News арқылы жаңалықтарымызды қадағалаңыз