Марко Рубио Ирандағы қыздар мектебіндегі жарылысқа қатысты пікір білдірді

Капитолийде журналистердің сұрақтарына жауап берген АҚШ мемлекеттік хатшысы Марко Рубио Вашингтонға бағытталған айыптауларға түсініктеме берді, деп хабарлайды Arasha.kz. 

Тегеранның ресми мәліметінше, Минаб қаласындағы қыздар мектебіне жасалған соққы салдарынан шамамен 165 адам қаза тапқан, олардың басым бөлігі — балалар. Бұған дейін АҚШ шабуылы 80-нен 100-ге дейін қыздың өмірін қиғаны айтылған.

Журналистердің сұрағына жауап берген Рубио оларды Қорғаныс министрлігіне жолдады. Сонымен бірге, америкалық әскери қызметкерлер азаматтық нысанды, әсіресе мектепті, әдейі нысанаға алмайтынын мәлімдеді. Оның айтуынша, соққы тек әскери инфрақұрылым нысандарына бағытталған. Минабтағы қыздар мектебі Ислам революциясы сақшылары корпусының (КСИР) ғимараттарына жақын орналасқан.

BBC News дерегінше, Минабтағы жарылыстан кейін түсірілген бейнежазбалар шынайы. Алайда қаза тапқандардың нақты саны тәуелсіз түрде расталмаған.

Рубио сондай-ақ Дональд Трамп Иранға қарсы құрлық операциясын жүргізу мүмкіндігін жоққа шығармайтынын айтты. Бұған дейін АҚШ президенті Иранға қарсы соғыс «қанша қажет болса, сонша жалғасатынын» мәлімдеген еді.

Мемлекеттік хатшы Трамптың ұстанымын қолдай отырып, Иранға қарсы ең қатаң соққылар әлі алда екенін жеткізді.

«Келесі кезең бұл ел үшін бұдан да ауыр болады. Құрама Штаттардың өз мақсаттары бар, және Ақ үй сол мақсаттарға жету үшін қанша қажет болса, сонша әрекет етеді», — деді Рубио брифинг барысында.

Оның сөзінше, АҚШ операциясы аяқталған соң әлем әлдеқайда қауіпсіз болмақ.