Мас кезінде рөлге отырған елорда тұрғыны бір жылға сотталды

АСТАНА, 15 қазан — Sputnik. 7 жылға жүргізуші куәлігінен айырылған елорда тұрғыны рөлге мас болып қайта отырғаны үшін 1 жылға бас бостандығынан айырылды, деп хабарлайды Sputnik Қазақстан Астана қаласының қылмыстық істер жөніндегі ауданаралық сотына сілтеме жасап.

Сотталушының кінәсі медициналық куәландыру қорытындысымен, заттай дәлелдемелермен және қылмыстық іс материалдарымен дәлелденді.

Прокурор сотталушыға 2 жыл 6 ай мерзімге бас бостандығынан айыра отырып, көлік құралын басқару құқығынан өмір бойына айыру түріндегі қосымша жаза тағайындауды сұрады.

"Сотталушы кінәсін мойындап, бостандығынан айырумен байланысты емес жаза тағайындауды сұрады", - деп жазылған хабарламада.

Жазаны тағайындау кезінде сот жазаны жеңілдететін мән-жайлар ретінде сотталушының кінәсін мойындауын, жасаған ісіне шын өкінуін және бұрын сотталмағанын ескерді. Сотталушының жазасын ауырлататын мән-жайлар анықталған жоқ.

Сот оған 1 жыл мерзімге бас бостандығынан айыру және көлік құралын басқару құқығынан өмір бойына айыру жазасын кесті.

Үкім заңды күшіне енген жоқ.