Мемлекеттік кеңесші Е. Қарин ЮНИСЕФ тің аймақтық директоры Реджина Де Доминичиспен кездесті

Мемлекеттік кеңесші Ерлан Қарин Алматыда БҰҰ Балалар қорының Еуропа және Орталық Азия бойынша аймақтық директоры Реджина Де Доминичиспен кездесті. Ерлан Қарин балаларды қорғау және олардың қауіпсіздігін сақтау - мемлекеттік саясаттың басым бағыты әрі бұл мәселе ел Президентінің жіті назарында екенін атап өтті. Сонымен қатар Қазақстанда балалар құқығын қорғаудың заңнамалық және институционалдық негіздері қалыптасқанын айтты. 

Қабылданған заңнамалық шаралардың нәтижесінде балаларға қатысты аса ауыр қылмыстар 30%-ға, ал балалар мен жасөспірімдерді жыныстық қатынасқа түсуге мәжбүрлеу қылмыстары 12,5%-ға азайды. Сондай-ақ «Адал азамат» біртұтас тәрбие бағдарламасы қабылданып, іске асырылуда. «Қазақстан балалары» біртұтас кешенді бағдарламасы мүдделі мемлекеттік органдармен келісу үстінде. Бала құқықтарын қорғау жүйесін өңірлік деңгейде одан әрі нығайту ісі жүріп жатыр. 

Атап айтқанда, бала құқықтары жөніндегі басқармалар құрылып, қорғаншылық ұйымдарының штаты ұлғаюда. Реджина Де Доминичис Қазақстанның бала құқықтарын қорғау саласында қабылдаған шараларын жоғары бағалады. Сондай-ақ Қазақстан бұл бағытта өңірдің ғана емес, Еуропаның бірқатар мемлекетіне үлгі болып отырғанын жеткізді. Ол Қазақстан Президентінің осы саладағы реформалары балаларды қорғау ісіне серпін әкелгенін айтты.

Кездесу соңында тараптар ынтымақтастықты одан әрі нығайтуға және болашақ ұрпақтың мүддесі үшін бірлескен бастамаларды жүзеге асыруға дайын екенін растады.