Мемлекеттік мобильді қосымшаларды біріктіруге шешім қабылданды

АСТАНА, 20 қазан – Sputnik. Үкімет жанындағы цифрлық штаб барлық мемлекеттік мобильді сервисті біріктіруге шешім қабылдады, деп хабарлайды Sputnik Қазақстан үкіметтің ресми сайтына сілтеме жасап.

Бұл шешімнің негізгі мақсаты – халыққа ыңғайлы және қауіпсіз цифрлық ортаны қалыптастыру.

"Осыған байланысты барлық мемлекеттік мобильді сервис SuperApp қағидаты бойынша eGov және Aitu экожүйелеріне кезең-кезеңімен біріктіріледі. Интеграция мобильді қосымшалардың бытыраңқылық мәселесін жояды, үдерістерді жеделдетеді және халыққа мемлекеттік қызметтер көрсету сапасын арттырады", - делінген ресми хабарламада.

Бұдан бөлек, мемлекеттік органдар мен оларға ведомстволық бағынысты ұйымдарға жеке мобилді қосымшаларды әзірлеуге тыйым салынды. Оны тек eGov және Aitu платформаларында жүзеге асыруға рұқсат беріледі.

Айта кетері, цифрлық штабты премьер-министр басқарады.